Mańǵystaýda 300-den astam áıel-pedagog robototehnıka treneri atanady
ASTANA. KAZINFORM – Oqý-aǵartý mınıstrliginiń qoldaýymen Tsıfrlandyrý jáne jasandy ıntellekt jyly aıasynda Mańǵystaý oblysynda STEM Hanym bilim berý bastamasy iske qosylady.
Joba aıasynda 300-den astam áıel-pedagog robototehnıka jáne zamanaýı STEM baǵyttary boıynsha tegin oqıdy. Bastama Aqtaý jáne Jańaózen qalalaryn, Shetpe, Beıneý, Quryq aýyldaryn qamtıdy.
STEM Hanym jobasyna onlaın oqýdan jáne konkýrstyq irikteýden sátti ótkender qatysa alady. Baǵdarlama pedagogterge, pedagogıkalyq fakýltetterdiń stýdentterine, erekshe bilim berý qajettiligi bar balalardy tárbıelep otyrǵan analarǵa, sondaı-aq tehnologııalar men tsıfrlyq mamandyqtar salasynda damýǵa qyzyǵýshylyq tanytatyn erekshe qajettiligi bar áıelderge arnalǵan.
️ Joba STEM salasyndaǵy áıelderdiń rólin arttyrýǵa, óńirlerde ınjenerlik bilim berýdi damytýǵa jáne robototehnıka boıynsha jańa býyn tálimgerlerin daıarlaýǵa baǵyttalǵan.
Oqytý jergilikti jerlerde uıymdastyrylady. Tájirıbeli trenerler óńirlerge baryp, tájirıbelik sabaqtar ótkizedi.
Qatysýshylar 3D modeldeý, robototehnıka, jasandy ıntellekt, ınjenerlik oılaý, komandalyq jumys negizderin meńgerip, oqýshylardy halyqaralyq tehnologııalyq jarystarǵa daıyndaý daǵdylaryn úırenedi.
STEM Hanym jobasynyń alǵashqy legi 2025 jyly Atyraý oblysynda júzege asyrylyp, onda 300-den astam áıel oqýdan ótti. Baǵdarlama túlekteri búginde Qazaqstan atynan respýblıkalyq jáne halyqaralyq robototehnıka chempıonattaryna, sonyń ishinde Hıýstonda ótken FIRST álem chempıonatyna qatysyp júr.
Aıta ketelik astanalyq oqýshylar robototehnıkadan halyqaralyq chempıonatta úzdikterdiń qataryna engen edi.
