Mańǵystaýda 3 jasar búldirshin balabaqshada aýyr jaraqat aldy

AQTAÝ. KAZINFORM — Oqıǵa Aqshuqyr aýylyndaǵy jekemenshik balabaqshada bolǵan. Búldirshinniń bir saýsaǵynyń tyrnaǵy julynyp qalyp, zardap shekken.

— Shamamen saǵat 11:30–da tárbıeshi habarlasyp, balanyń qolyn staqanmen kesip alǵanyn aıtty. Men kelgende, saýsaǵyn shkaftyń esigi qysyp qalǵany belgili boldy. Tyrnaǵy tolyqtaı julynǵan, saýsaǵy qatty qanap turdy, — deıdi balanyń anasy.

Ata-ananyń aıtýynsha, tárbıeshi balaǵa alǵashqy medıtsınalyq kómek kórsetpegen jáne jedel járdem shaqyrmaǵan.

— Biz balany ózimiz oblystyq balalar aýrýhanasyna apardyq. Dáriger jaǵdaıdyń aýyr ekenin aıtty. Súıekti jabý úshin balanyń bileginen teri alýǵa týra keldi. Ota jasalmasa, saýsaq jaramsyz bolyp qalýy múmkin edi, — deıdi balanyń anasy.

Osy oqıǵaǵa baılanysty polıtsııa departamenti qylmystyq is qozǵady. Al, Mańǵystaý oblystyq bilim basqarmasy oqıǵanyń mán-jaıy anyqtalyp jatqanyn habarlady.

Buǵan deıin, Aqtaý qalasynyń prokýrory mas kúıinde tártip buzǵany úshin ustalǵany týraly jazǵan bolatynbyz.