Mańǵystaýda 280 dáriger jetispeıdi
AQTAÝ. KAZINFORM — Mańǵystaýda maman tapshy. Sonyń ishinde 80 maman aýyldyq jerlerge qajet.
— Kadr tapshylyǵy — medıtsınadaǵy negizgi másele. Óńirde 280 dáriger tapshy, onyń 200-i Aqtaýdyń ózinde tabylmaı otyr, — deıdi oblystyq densaýlyq saqtaý basqarmasynyń basshysy Bekbolat Іzbasarov.
Sondyqtan aımaqqa dárigerlerdi shaqyryp, turaqtandyrý úshin jan-jaqty qoldaý kórsetiledi.
— Aýyldyq jerlerge jumysqa keletin mamandarǵa 8,5 mıllıon, Jańaózen qalasyna keletin mamandarǵa 5 mıllıon, al Aqtaý qalasyna keletin mamandarǵa 3 mln teńgeden birjolǵy áleýmettik kómek beriledi. Medıtsınalyq uıymdarǵa jumysqa keletin jas mamandar men shaqyrylǵan mamandardy jergilikti bıýdjet esebinen turǵyn úımen qamtamasyz etý maqsatynda, bıyl 50 qyzmettik páter (Aqtaýda 35, Jańaózende 15) satyp alý qarastyrylǵan, — deıdi basqarma basshysy.
Atalǵan qoldaýdyń arqasynda Jańaózen qalasyna byltyrdan beri 8 dáriger kelgen. Mamandar 5 mıllıon teńgeden bir jolǵy áleýmettik kómekti alyp, baspanamen qamtylǵan. Solardyń biri — Erlan Áshirbekov. Reanımatolog dáriger Pavlodar oblysy Baıanaýyl aýdanynan arnaıy shaqyrylǵan. Qazir Jańaózen qalalyq kópbeıindi aýrýhanasy jansaqtaý bólimi meńgerýshisiniń mindetin atqarady.
— Mańǵystaýǵa, onyń ishinde Jańaózen qalasyna qonys aýdarýyma sebepshi bolǵan osy aýrýhananyń basshylyǵy men jergilikti ákimshilik. Bir jolǵy kómekterin berdi. Qyzmettik páter bergenge deıin qazirgi páterdiń jaldaý qunyn tólep jatyr. Áriptesterim de, Jańaózenniń halqy da jyly qarsy aldy. Bizdiń maqsatymyz — Qazaqstannyń qaı óńirinde bolsyn, halyqqa medıtsınalyq kómek kórsetý, — deıdi reanımatolog dáriger.
Oblysta tapshy mamandar: reanımatologtar, endokrınologtar, onkologtar, gematologtar, gınekologtar, travmatologtar, pedıatorlar, terapevter men jalpy tájirıbeli dárigerler.
Buǵan deıin, Mańǵystaýda Kaspıı teńizinde qyrylǵan ıtbalyqtardyń zertteý qorytyndysynyń qashan jarııalanatyny týraly jazǵan bolatynbyz.