Mańǵystaýda 250 referendým ýchaskesi jumys istep tur
AQTAÝ. KAZINFORM – Aımaqta 250 referendým ýchaskesi jumys istep jatyr. Sonyń 85-i Aqtaý qalasynda ornalasqan. Shaharda barlyǵy – 162 574 daýys berýshi bar. Aqtaýlyq úshem Janarys, Bekarys, Aqarys qoǵamdyq mańyzdy sharaǵa atsalysyp, daýys berýge birge kelgen. Áskerı qyzmetshiler №48 referendým ýchaskesinde tańdaýlaryn jasady.
– Osyndaı árbir naýqandy qur jibermeımiz, mindetti túrde qatysyp, daýys beremiz. Bizdiń jasaǵan tańdaýymyz, bergen daýysymyz elimizdiń bolashaǵy úshin mańyzdy, - deıdi úshem.
Al, Mańǵystaý aýdany Shetpe aýylyndaǵy bir áýlettiń abysyndy kelinderi birge kelip, daýys berdi. «Abysyn – ajyn» baıqaýynyń respýblıkalyq kezeńiniń jeńimpazy Bekmaǵulovtar áýletiniń 9 kelini mańyzdy sheshim qabyldanar kúndi merekege balap, óz qoldarymen tikken ulttyq kıimderin kıip kelgen.
– Bárimiz bir aýyzdan kelýdi sheshtik. «Abysyn tatý bolsa as kóp» degen dana halqymyzdyń qaǵıdasyn ustana otyryp, kelinderime birge barýǵa usynys tastadym, olar meni qoldady. Árqaısymyz beıbit te berekeli elimizdiń keleshegi úshin, urpaǵymyzdyń erteńgi baıqýatty ómiri úshin jaýapkershilik tanytyp, daýys berdik, - deıdi kelinderdiń úlkeni Jańylhan Emenova.
Mańǵystaý aýdany Qyzan aýylyndaǵy №180 referendým ýchaskesinde Álem kýbogynyń ıegeri, QR chempıonatynyń chempıony, kıkboksıngten sport sheberi Saıynov Jubatqan da óz tańdaýyn jasady.
– Árkimniń daýsy mańyzdy ekenin eskerip,óz tańdaýymdy jasadym, - dedi jas sportshy.
Buǵan deıin, Jańaózen qalasynda referendýmnyń qalaı ótip jatqanyn jazǵan bolatynbyz.
