Mańǵystaýda 13 jastaǵy balanyń ólimine qatysty qylmystyq is sotqa joldandy
AQTAÝ. KAZINFORM — Mańǵystaýda 13 jastaǵy balanyń ólimine qatysty qylmystyq is sotqa joldandy. Al, medıtsınalyq kómekti uıymdastyrý kezinde óreskel zań buzýǵa jol bergen oblystyq balalar aýrýhanasynyń dırektory qyzmetinen bosatylǵan. Bul týraly Densaýlyq saqtaý mınıstri Aqmaral Álnazarova málimdedi.
Oqıǵa bıyl qańtar aıynda boldy. 13 jastaǵy balanyń ishi qatty aýyryp, oblystyq kópbeıindi balalar aýrýhanasyna jetkizilgen.
Anasynyń aıtýynsha, dárigerler ony birneshe saǵat baqylaǵannan keıin úıine qaıtarǵan. Keıin jaǵdaıy nasharlaǵan jasóspirim birneshe ret medıtsınalyq kómekke júgingen. Alaıda naqty dıagnoz qoıylmaǵan.
Naýqas aýrýhanaǵa aýyr jaǵdaıda túsken soń ota jasalǵan. Dárigerler balanyń isheginiń bir bóligin alyp tastaýǵa májbúr bolǵan. Keıin ol sanıtarlyq avıatsııamen Almatyǵa jetkizilgenimen, dárigerler ómirin saqtap qala almady.
Qaıǵyly jaǵdaıdan keıin Medıtsınalyq jáne farmatsevtıkalyq baqylaý komıteti jospardan tys tekserý júrgizgen. Sonymen qatar jergilikti atqarýshy organdar janynan komıssııa quryldy. Nátıjesinde oblystyq kópbeıindi balalar aýrýhanasy men Aqtaý qalasyndaǵy № 2 qalalyq emhanada medıtsınalyq kómekti uıymdastyrý jáne kórsetý kezinde óreskel zań buzý anyqtalǵan.
Osydan keıin oblystyq balalar aýrýhanasynyń dırektory qyzmetinen bosatyldy. Al medıtsınalyq kómek kórsetýge qatysty prokýratýra qylmystyq is qozǵaǵan. Sotaldy tergeý aıaqtalyp, is materıaldary sotqa joldandy.
Densaýlyq saqtaý mınıstri Aqmaral Álnazarova isti baqylaýda ustaıtynyn málimdedi. Mınıstrdiń aıtýynsha, mundaı jaǵdaılar naqty qorytyndy men júıeli sheshimdi talap etedi. Ol qaza bolǵan balanyń anasyn jeke qabyldaıtynyn aıtyp, kináliler zań aıasynda jaýapqa tartylýy tıis ekenin jetkizdi.
Buǵan deıin, Mańǵystaýda 13 jasar jasóspirimniń óliminen keıin medıtsınalyq uıymdar tekserilip jatqanyn jazǵan bolatynbyz.
