Mańǵystaýda 13 jasar jasóspirimniń óliminen keıin medıtsınalyq uıymdar tekserilip jatyr
AQTAÝ. KAZINFORM – Qazaqstan Respýblıkasy Densaýlyq saqtaý mınıstrligi Mańǵystaý oblysynda 13 jastaǵy jasóspirimniń ólimine baılanysty tekseris júrgizip jatyr.
Densaýlyq saqtaý mınıstrligi baspasóz qyzmetiniń málimetinshe, kámeletke tolmaǵan naýqastyń ólimine baılanysty jan-jaqty tekseris júrgizý úshin arnaıy komıssııa qurylǵan. Onyń quramynda Medıtsınalyq jáne farmatsevtıkalyq baqylaý komıteti tóraǵasynyń orynbasary - bas memlekettik medıtsınalyq ınspektor men táýelsiz sarapshylar bar.
-2026 jylǵy 19 aqpanda naýqas sanıtarlyq avıatsııa arqyly Almatydaǵy Pedıatrııa jáne balalar hırýrgııasy ǵylymı ortalyǵyna jetkizildi. Kórsetilgen medıtsınalyq kómekke qaramastan, 13 sáýirde ol kóz jumdy, - delingen habarlamada.
Jospardan tys tekserýler nátıjesinde birqatar zańbuzýshylyq anyqtalǵan. Olar: naýqastyń aýrýhanaǵa jatqyzylmaı, birneshe ret úıine qaıtarylýy, konsılıýmdardyń ótkizilmeýi, júginýlerdiń tolyq tirkelmeýi, naýqastyń jaǵdaıyn jetkiliksiz baǵalaý, klınıkalyq hattamalardyń saqtalmaýy.
Sondaı-aq Aqtaý qalalyq №2 emhanasynda da zańbuzýshylyqtar anyqtalǵan.
Mınıstrlik málimetinshe, dárigerler naýqastyń anamnezin tolyq jınamaǵan, zerthanalyq derekter eskerilmegen, dıagnoz ben klınıkalyq kórinis arasynda sáıkessizdikke jol bergen, al bir jaǵdaıda naýqasqa tikeleı tekserý júrgizilmegen.
Mańǵystaý oblystyq densaýlyq saqtaý basqarmasy tekserýlerdiń nátıjesi prokýratýraǵa joldanǵanyn jetkizdi.
-Mańǵystaý oblystyq densaýlyq saqtaý basqarmasy jáne medıtsınalyq jáne farmatsevtıkalyq baqylaý komıtetiniń oblystyq departamenti tarapynan tekserý jumystary júrgizildi. Tekserý qorytyndysyna baılanysty tıisti medıtsınalyq uıymdardyń basshylaryna jáne qyzmetkerlerine qatysty tártiptik sharalar qarastyryldy. Tekserý materıaldaryna quqyqtyq baǵa berý jáne protsesýaldyq sheshim shyǵarý úshin Aqtaý qalasynyń prokýratýrasyna joldandy, - deıdi oblystyq densaýlyq saqtaý basqarmasy basshysynyń orynbasary Bıbizada Dúısenbaeva.
Bul jaǵdaı týraly marqumnyń anasy jarııalaǵan bolatyn.
Juldyz Azanovanyń aıtýynsha, 17 qańtarda balasynyń ishi kenetten aýyrǵan. Ony «soqyrishek qabynýy» kúdigimen oblystyq balalar aýrýhanasynyń qabyldaý bólimine jetkizgen, alaıda úsh saǵat baqylaýdan keıin úıine jibergen. Balanyń jaǵdaıy jaqsarmaı, ishi aýyryp, dene qyzýy kóterilgen. Otbasy birneshe ret emhana men juqpaly aýrýlar aýrýhanasyna júgingenimen, naqty dıagnoz qoıylmaı, jasóspirimdi qaıta-qaıta úıine qaıtaryp otyrǵan.
Aqyrynda naýqastyń jaǵdaıy nasharlaǵanda ǵana aýrýhanaǵa jatqyzylyp, ota jasalǵan. Alaıda jasóspirimniń beti beri qaramaı, sanıtarlyq avıatsııamen Almatyǵa jetkizildi. Ortalyqta medıtsınalyq kómek kórsetilgenimen, balany aman alyp qalý múmkin bolmaǵan.
Buǵan deıin, Aqtaýda qant dıabetine shaldyqqan naýqastar tegin dáriden qaǵylyp, densaýlyqtary nasharlaǵany týraly jazǵan bolatynbyz.
