Mańǵystaýda 100 myńnan astam turǵyn baspana jeńildiginen aıyrylǵan

ASTANA. KAZINFORM – Prokýratýranyń aralasýymen azamattardyń quqyǵy qalpyna keltirildi.

Mańǵystaý prokýratýrasy normatıvtik quqyqtyq aktilerdiń monıtorıngi sheńberinde halyqtyń áleýmettik osal toptarynyń quqyǵyna nuqsan keltiretin buzýshylyqtardy anyqtady.

Oblystyq máslıhattyń 25.10.2019j. №31/368 sheshimimen turǵyn úı járdemaqysyn alýshylardyń mólsheri men sanattarynyń tizbesi bekitildi. Bul jeńildikter azamattardyń jekelegen sanattaryna turǵyn úı baǵdarlamalary sheńberinde bastapqy jarna nemese turǵyn úı qunyn ishinara tóleý kezinde memlekettik qoldaý kórsetýge arnalǵan.

Ótken jyly turǵyn úı járdemaqysyn berýdi retteıtin qoldanystaǵy zańnamaǵa ózgerister men tolyqtyrýlar engizilip, alýshylardyń sanattarynyń sany 2-den 12-ge deıin keńeıtilgeni anyqtaldy. Oblystyq máslıhattyń sheshimine tıisti ózgeristerdiń engizilmeýiniń nátıjesinde 100 myńnan astam azamat (onyń ishinde halyqtyń áleýmettik osal toptary)kózdelgen turǵyn úı jeńildikterin paıdalaný múmkindiginen aıyryldy.

Prokýrordyń narazylyǵymen qala jáne aýdan máslıhattarynyń sheshimi qoldanystaǵy zańnamaǵa sáıkestendirildi.

Qabyldanǵan sharalar nátıjesinde memlekettik qoldaýdy qajet etetin azamattardyń quqyǵy qalpyna keltirildi.

Aıta keteıik, turǵyn úıdi satyp alý-satý mámileleriniń sany 3,1% azaıdy.