Mańǵystaýda 10 kún buryn iz-tússiz joǵalǵan turǵyn áli tabylmaı jatyr
AQTAÝ. KAZINFORM — 33 jastaǵy aqtaýlyq Erlan Esmaǵambetov osydan 10 kún buryn «Kendirli» demalys bazasy aýmaǵynda joǵalǵan.
Ol Aqtaý qalasyna barmaq bolyp, joldan kólikke otyrǵan. Biraq, kóp uzamaı qaıta túsip qalypty. Sodan beri habar-osharsyz. Oblystyq tótenshe jaǵdaılar departamentiniń habarlaýynsha, Jańaózen qalasy men Kendirli demalys bazasy aýmaǵynda birneshe kúnnen beri izdestirý-qutqarý jumystary júrgizilip jatyr.
— Qazirgi ýaqytta izdeý-qutqarý jumystary jalǵasýda. Oblystyq tótenshe jaǵdaılar qyzmeti, jergilikti turǵyndar jumyldyryldy. Tikushaqpen izdep jatyrmyz. Drondar, arnaıy tehnıka men jabdyqtar qoldanylýda, — delingen habarlamada.
Joǵalǵan azamatty izdeýge volonterlar da kirisken. Alaıda ázirge nátıje joq. Sondyqtan olar jol talǵamaıtyn kóligi bar eriktelerdi kómekke shaqyrýda.
— Іz-tússiz joǵalǵan turǵyndy tabý úshin Kenderli-Jańaózen baǵytyna shyǵa alatyn kólikter qajet. Drony bar adamdar da kómekke kelse jaqsy bolar edi. Qazir kez-kelgen kómek mańyzdy, — deıdi volonterlar.
Buǵan deıin, Aqtaýda dárigerler 74 jastaǵy naýqastyń moınynan 1 kelideı isikti alǵany týraly jazǵan bolatynbyz.