Mańǵystaýda 10 adamnyń ólimine sebepker bolǵan kólik júrgizýshi qamaýǵa alyndy

AQTAÝ. KAZINFORM – Oblysta 11 qyrkúıek kúni bolǵan jantúrshigerlik jol kólik apatyna qatysty jańa derekter jarııalandy. Jańaózen qalalyq aýrýhanasynyń málimetinshe, zardap shekken 3 naýqas aýrýhanadan shyǵarylǵan.

Eki naýqas bastapqyda Aqtaý qalasyndaǵy oblystyq kópsalaly aýrýhanasyna sanavıatsııamen jetkizilip, odan ári emdelý úshin Astanaǵa jiberilgen bolatyn. Al úshinshi zardap shekken er azamatqa ota jasalǵan. Jaǵdaıy turaqtalyp, aýrýhanadan shyǵarylǵan soń, ony tergeý ızolıatorynyń qyzmetkerleri alyp ketken.

Oblystyq Polıtsııa departamenti baspasóz qyzmetiniń habarlaýynsha, kólik júrgizýshi tergeý ızolıatoryna qamaldy. Tergeý amaldary jalǵasyp jatyr.

– Ol – apat bolǵan kóliktiń júrgizýshisi. Oǵan QR Qylmystyq kodeksiniń 345-baby - «Kólik qozǵalysy nemese kólikti paıdalaný erejesin buzý, adamdardyń ólimine ákelý» boıynsha qylmystyq is qozǵaldy, - delingen habarlamada.

Eske salaıyq, atalǵan jol apatynyń saldarynan 10 adam qaza tapty. Olar elimizdiń ózge óńirlerinen kelip, Beket ata jerasty meshitine bara jatqan.

Buǵan deıin Mańǵystaýda jol-kólik apatynan 10 adam qaza tapqany týraly jazǵan bolatynbyz.