Mańǵystaý jurty qaza tapqan sarbazdardy sońǵy saparǵa shyǵaryp saldy
ASTANA. KAZINFORM — Búgin Mańǵystaý oblysynda áskerı boryshyn óteý kezinde qaza tapqan áskerı qyzmetshilermen qoshtasý rásimi ótti. Bul týraly oblystyq ákimdiktiń baspasóz qyzmeti málim etti.
Qaraly rásimge Mańǵystaý oblysynyń ákimi Nurdáýlet Qılybaı, Qazaqstan Respýblıkasynyń Qorǵanys mınıstri Dáýren Qosanov, Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Ulttyq quryltaı músheleri, «Qazaqstan Halyq Keńesiniń» músheleri, sondaı-aq belgili qoǵam qaıratkerleri men marqumdarmen qyzmettes bolǵan azamattar qatysty.
Rásimge qatysýshylar qaza bolǵan jaýyngerlerdiń týǵan-týysy men jaqyndaryna orny tolmas qaıǵyǵa ortaqtasyp, kóńil aıtty. Otan qorǵaýshylardyń rýhyna Quran baǵyshtalyp, qudaıy rásimder jasaldy.
Memleket basshysynyń tapsyrmasyna sáıkes, qaza bolǵan áskerı qyzmetshilerdiń otbasylaryna memlekettik áleýmettik tólemder, materıaldyq qoldaý jáne janaza men jerleý rásimderin uıymdastyrýǵa qajetti jan-jaqty kómek kórsetilip jatyr.
Qarajatty jınaqtaý maqsatynda Mańǵystaý oblysynyń ákimdigi tarapynan buǵan deıin arnaıy qor aıqyndalǵan bolatyn.
— Jınaqtalǵan barlyq qarajat qaza bolǵan áskerı qyzmetshilerdiń otbasylaryna jáne zardap shekkenderge ataýly ári ashyq túrde, memlekettik jáne quqyq qorǵaý organdarynyń qatań baqylaýymen baǵyttalady. Mańǵystaý oblysynyń ákimdigi qaza bolǵan áskerı qyzmetshilerdiń otbasylaryna, ata-analary men jaqyndaryna qaıǵyryp kóńil aıtady, — delingen habarlamada.
Aıta keteıik, buǵan deıin Qorǵanys mınıstri qara jamylǵan otbasylarǵa kóńil aıtqan bolatyn.
Al keshe Mańǵystaý oblysynda qyzmettik mindetin atqarý kezinde qaza tapqan áskerı qyzmetshi, aǵa leıtenant Oljas Muhtarulynyń denesi Túrkistanǵa jetkizilgen edi.
