Mańǵystaý jerasty meshitteri ıÝNESKO tizimine engizilmek
AQTAÝ. KAZINFORM – Mańǵystaý oblysynyń ákimi Nurdáýlet Qılybaıdyń tóraǵalyǵymen «Mańǵystaý túbeginiń jartas meshitteri» eskertkishterin ıÝNESKO-nyń búkilálemdik muralar tizimine engizý máselesi talqylandy. Jıynǵa IKOMOS tehnıkalyq baǵalaý mıssııasynyń ókilderi qatysty.
Memleket basshysynyń Ulttyq quryltaıda bergen tapsyrmasyna sáıkes óńirdegi bes jerasty meshitin – Beket ata, Qaraman ata, Shaqpaq ata, Shopan ata jáne Sultan úpi meshitterin halyqaralyq tizimge engizý jumystary júrgizilýde.
Atalǵan eskertkishter 2021 jyly ıÝNESKO-nyń aldyn ala tizimine engen. Osy baǵytta Mádenıet jáne aqparat mınıstrliginiń jetekshiligimen ǵylymı-jobalyq qujattar ázirlenip, Parıjdegi shtab-páterge joldandy.
Sondaı-aq qorǵaý aımaqtary belgilenip, aqparattyq taqtaıshalar ornatyldy, foto jáne beınematerıaldar daıyndaldy.
Mıssııa aıasynda óńirge halyqaralyq sarapshylar keldi. Olardyń qatarynda Býrsa Ýlýdag ýnıversıtetiniń professory, IKOMOS sarapshysy Kivilcim Corakbas Figen Balikesir, ıÝNESKO jáne ISESKO isteri jónindegi ulttyq komıssııa múshesi Dmıtrıı Voıakın, «Qazrestavratsııa» ShJQ RMK bas dırektory Oljas Sharııazdanov jáne atalǵan mekemeniń sáýletshisi Lázzat Beısembaeva bar.
Oblys ákimi Nurdáýlet Qılybaı Mańǵystaýdyń tarıhı-mádenı murasynyń mańyzyn atap ótti.
– Mańǵystaý – tarıhy tereń ólke. Munda ejelgi qorymdar, sáýlet óneriniń kórnekti týyndylary sanalatyn tamdar men saǵanalar, jerasty meshitteri bar. «Mádenı mura» baǵdarlamasy aıasynda osy eskertkishterdi qorǵaý baǵytynda keshendi jumystar júrgizildi. Sonyń nátıjesinde bes jerasty meshiti ıÝNESKO-nyń aldyn ala tizimine engizildi. Qazirgi tańda qorǵaý aımaqtary belgilenip, ǵylymı-zertteý jumystary júrgizilýde. Bul nysandardyń búkilálemdik muralar qataryna enýi halqymyzdyń tarıhı qundylyqtaryn saqtap qana qoımaı, elimizdiń mádenı jáne ekonomıkalyq damýyna serpin beredi, – dedi aımaq basshysy.
Kezdesý sońynda ákim mıssııa jumystarynyń aımaq úshin mańyzy zor ekenin atap ótip, barlyq shara halyqaralyq talaptarǵa saı jalǵasatynyn jetkizdi.
Buǵan deıin ıÝNESKO-nyń «Álem jady» baǵdarlamasyna Abaı qoljazbasyndaǵy «Qara sózder» kirýi múmkin ekeni habarlandy.