Mańǵystaý jastary «Ybyqty-Saı» shatqalyna senbilik jasady
AQTAÝ. KAZINFORM — Mańǵystaýda «Taza Qazaqstan» atty ekologııalyq aktsııa sheńberinde qala belsendileri «Ybyqty-Saı» tarıhı ornyna tazalyq jumystaryn júrgizdi.
Qoǵamdyq kommýnıkatsııalar ortalyǵynyń málimetinshe, ekologııalyq aktsııaǵa oblystyq «Jastar» resýrstyq ortalyǵynyń ókilderi jáne «Yessenov» kolledjiniń stýdentteri atsalysty.
«Mańǵystaý oblysy eriktileriniń uıymdastyrýymen Ybyqty-Saı shatqalyna senbilik ótkizýdi uıǵardyq. Kıeli ólkeniń kórikti jerlerine saıahattaıtyn týrıster aǵyny jyl saıyn artyp keledi. Tabıǵat-Ananyń qymbat qazynasy retinde mundaı jádigerlerdiń bastapqy qalpyn buzbaı, jaınap turýy tikeleı bizge baılanysty. Urpaqtyń jarqyn keleshegi týǵan jerine degen súıispenshilikten bastalady», — dedi qala eriktisi Amangúl Jamken.
Ybyqty-Saı shatqaly Aqtaýdan 60 shaqyrym jerde ornalasqan. Tabıǵat týyndysy Qazaqstannyń eń tereń oıpaty Qaraqııada ornalasqan. Kóptegen adamdar ony ashyq shatqal dep ataıdy. Mıllıondaǵan jyldar boıy jańbyr men jel mújip, minsiz músindegen shatqaldar kórkimen kóz baýraıdy. Tańǵajaıyp labırıntter men arkalardyń álemine engendeı kúıge bóleıdi.