Mańǵystaý jaǵalaýyndaǵy balyqtardyń qyrylý sebebi belgili boldy
AQTAÝ. KAZINFORM - 7 shilde kúni Manǵystaý oblysy, Túpqaraǵan aýdanyndaǵy Baýtın jáne Atash eldi mekenderiniń mańynda Kaspıı teńiziniń jaǵasynda aqbalyq (kefal), taban, maıshabaq, qarakóz balyqtarynyń ólgen shabaqtary tabylǵan.
Aýyl sharýashylyǵy mınıstrligi Balyq sharýashylyǵy komıteti Jaıyq-Kaspıı oblysaralyq basseındik balyq sharýashylyǵy ınspektsııasynyń uıymdastyrýymen jaýapty organ mamandary, jergilikti ekologııa departamentiniń qyzmetkerleri zertteý jumystaryn júrgizdi.
Oqıǵa bolǵan jerde balyqshylardyń respýblıkalyq qaýymdastyǵynyń Manǵystaý oblysy boıynsha ókili de boldy.
— Zertteý barysynda Balyq shabaqtary jaǵaǵa soltústik batystan soqqan qatty jeldiń saldarynan shyǵyp qalǵany anyqtaldy. Jergilikti ekologııa departamentiniń mamandary teńizden balyqtardyń qyrylý sebebin anyqtaý maqsatynda sý synamalaryn aldy. Alaıda, balyq shabaqtarynyń qatty ydyrap ketýine baılanysty, olardyń synamalaryn alý múmkin bolmady, — delingen Balyq sharýashylyǵy komıteti habarlamasynda.
Qazirgi tańda jergilikti atqarýshy organ tarapynan tabylǵan balyq shabaqtaryn jınaý, olardy sanıtarlyq normalardy saqtaı otyryp joıý jumystary júrgizilip jatyr.
— Anyqtalǵandaı, jaǵalaýdan aqbalyq, qarakóz, maıshabaq syndyq 40-qa jýyq balyq tabyldy. Balyqtardyń qyrylý sebebi — kúnniń kúrt ysyp ketýi jáne sýdaǵy ottegi mólsheriniń azaıyp ketýi. Qazirgi tańda, Kaspıı teńiziniń jaǵalaýyn monıtorıngi jalǵasýda. Jaǵdaı Jaıyq-Kaspıı oblysaralyq basseındik balyq sharýashylyǵy ınspektsııasynyń baqylaýynda, — delingen habarlamada.
Aıta ketelik Mańǵystaýda teńiz jaǵalaýynan ólgen balyqtar tabylǵany týraly jazǵan edik.