Mańǵystaý tasjolynda júrgizýshilerge arnalǵan lazerlik júıe iske qosyldy
AQTAÝ. KAZINFORM – «QazAvtoJol» Ulttyq kompanııasynyń málimetinshe, Mańǵystaý oblysyndaǵy Beıneý – Aqjigit avtojolynyń ýchaskesinde júrgizýshilerge arnalǵan erekshe lazerlik júıe iske qosyldy.
Kompanııanyń deregine súıensek, bul erekshe tehnologııa túngi ýaqytta qoldanylady jáne uzaq jolda kele jatqan júrgizýshilerdiń zeıinin arttyrýǵa arnalǵan. Lazerlik baǵdarlar rólde sharshaý qaýpin azaıtyp, jol qozǵalysynyń qaýipsizdigin kúsheıtýge kómektesedi.
– Sonymen qatar Beıneý – Aqjigit aqyly avtojolynyń 85-shaqyrymynda, «Tájen» baqylaý-ótkizý pýnktiniń mańynda júrgizýshiler men jolaýshylarǵa arnalǵan zamanaýı sanıtarlyq-gıgıenalyq keshen ashyldy. Jańa nysan zamanaýı talaptarǵa saı jabdyqtalǵan jáne jol boıyndaǵy servısti jaqsartýǵa baǵyttalǵan, - delingen habarlamada.
Bul joba ásirese tranzıttik jáne júk tasymaly úshin mańyzdy, sebebi «Tájen» beketiniń mańyndaǵy jol ýchaskesi eń qarqyndy baǵyttardyń biri sanalady.
Buǵan deıin, Aqtóbe – Ulǵaısyn avtojolyndaǵy jóndeý jumystarynyń 2028 jyldyń sońynda aıaqtalatyny týraly jazǵan edik
