Mańǵystaý sportynda túbegeıli ózgeris jasalady
AQTAÝ. KAZINFORM - Mańǵystaý oblysyndaǵy bes sport mektebinde jańa taǵaıyndaý boldy.
Oblystyq dene shynyqtyrý jáne sport basqarmasynyń basshysy Maqsat Muqashtyń aıtýynsha, jańa basshylar arqyly sporttaǵy áleýetti arttyrý mindeti júktelip otyr.
«Salanyń kadrlyq áleýetin arttyrý óte mańyzdy. Sapaly, bilikti ári tyńǵylyqty iriktelgen kadrlyq quram — joǵary nátıjelerge qol jetkizýdiń kilti. Sporttyq nátıjelerdiń jaqsy bolýy bilikti menedjmentke táýeldi. Taǵaıyndalǵan basshylyq sporttyq nátıjelerdi damytýǵa baǵyt berip, aıtarlyqtaı jemisti jumys isteýi qajet. Sporttyq nátıjeler keshendi, naqty, keı jaǵdaıda batyl sheshimder qabyldaýdy qajet etedi. Osyǵan oraı, biz birqatar bastamany qolǵa alyp, jańashyldyqqa qadam bastyq», — dedi Maqsat Muqash.
Sonymen qatar, ol qoldanystaǵy erejege sáıkes memlekettik bıýdjetten qarjylandyratyn mekemelerdiń basshylyǵy 3 jyl saıyn attestatsııadan ótýi tıis ekenin atap ótti.
«Alaıda 8 jyl boıy atalǵan attestatsııa ótkizilmegen. Osy olqylyqtyń ornyn toltyrý úshin kezekti attestatsııadan ótkizýge osy jyldy bekittik. Attestatsııadan basqarmaǵa qarasty sport mekemeniń basshylary men orynbasarlary ótetin bolady», — dedi basqarma basshysy.
Aıta keteıik, konkýrstyń nátıjesinde óńirlik «Jas Batyr» mamandandyrylǵan balalar men jasóspirimder sport mektebine dzıýdo jáne sambo kúresinen QR sport sheberi Jomart Qoblanov jańa basshylyqqa keldi.
Sondaı-aq, «Olımpıadalyq emes sport túrlerinen Mańǵystaý oblystyq JSShM basshylyǵyna Azamat Ábilov bekitildi.
Budan bólek, «Aqtaý qalalyq tennıs boıynsha balalar men jasóspirimder sport mektebine Erjan Kojaev jańa basshy bolyp taǵaıyndalsa, Teńge aýylynyń balalar men jasóspirimder sport mektebine Berik Sydykov bekitilip otyr.
Sonymen qatar, Aqtaýdaǵy «Mańǵystaý arena» balalar men jasóspirimder sport mektebine Jaslan Nejımov jańa basshy bolyp taǵaıyndaldy. Ol osyǵan deıin Túpqaraǵan aýdandyq balalar men jasóspirimder sport mektebiniń Aqshuqyr aýyldyq fılıalynyń jetekshisi qyzmetin atqarǵan.
Osyǵan deıin «Kaspıı» fýtbol klýbynyń jańa dırektory taǵaıyndalǵan bolatyn. Bul qyzmetke osyǵan deıin dırektordyń mindetin ýaqytsha atqarǵan Nurjan Jalǵasbaev bekitildi.