Mańǵystaý sharýalary 98% jem-shóppen qamtylǵan

Mańǵystaý oblysynda aýa raıy jańbyrly bolyp, jetkilikti kólemde shóp jınaldy. Bul týraly óńir ákimi Nurlan Noǵaev elordadaǵy esep berý brıfınginde aıtty, dep habarlaıdy Kazinform. 

«Mal azyǵyn qamtamasyz etý boıynsha qazirgi tańda jemmen jáne shóppen 99 jáne 98 paıyz qamtamasyz etilgen. Onyń ústine bıyl aýa raıy jańbyrly bolyp, shóp jetkilikti jınaldy, qazir malymyz kúıli. Agroónerkásip keshenin qoldaý úshin barlyǵy 2,9 mlrd teńge qarajat bólingen edi. Sonyń ishinde 1,7 mlrd teńgesi mal sharýashylyǵyn damytýǵa baǵyttaldy», - dedi N.Noǵaev Ortalyq kommýnıkatsııalar qyzmetinde.

Ákimniń aıtýynsha, 1,5 mlrd teńge sýbsıdııa tólend. Sonyń ishinde 730 aýyl sharýashylyq sýbektilerine mal basyn kóbeıtýge qarajat tólengen.

«Mal sharýashylyǵyn damytýdaǵy mańyzdy másele – veterınarııa salasy, mal basynyń amandyǵy. Osy salalardy materıaldyq-tehnıkalyq bazamen jabdyqtaýǵa qajetti planshetter, ózderine júktelgen mindetti sapaly oryndaýyna jáne júrip-turýyna qajetti 47 Nıva kóligi jáne ólekselerdi órteıtin 2 KamAZ jyl sońyna deıin keledi. Munyń bári demeýshiler esebinen qamtylady. Osylaısha, veterınarlyq uıymdardyń materıaldyq-tehnıkalyq bazasyn jabdyqtaý 80 paıyzǵa jetedi. Dıagnostıkalyq jáne vaktsınalaý sharalarynyń sapasyn arttyryp, qajetti sharalardy ýaqytyly qabyldaýǵa bul da úlken septigin tıgizedi», - dedi N.Noǵaev.

Sonymen birge halyqtyń ál-aýqatyn arttyrý úshin óńirde 1,2 mlrd teńgege «Aýyl amanaty» baǵdarlamasy júzege asyrylyp jatyr. Qazir 1 mlrd 200 mln teńgege 165 joba maquldandy. Mal sharýashylyǵynda – 111, ósimdik sharýashylyǵynda – 6, basqalarynda 48 jobany júzege asyrýdy josparlanǵan.

Aıta keteıik, Mańǵystaý oblysynda tájirıbe túrinde 2 myń túp záıtún aǵashy egildi. Oń nátıje baıqalsa, kásipkerler 10 myń gektarǵa deıin záıtún egip, onyń maıyn kásip etýdi josparlap otyr.