Mańǵystaý polıtsııasynyń bastyǵy týraly feık aqparat tarady
AQTAÝ. KAZINFORM – Áleýmettik jelilerde Mańǵystaý oblystyq polıtsııa departamentiniń bastyǵy men onyń orynbasarlaryn «uıymdasqan qylmystyq top qurdy» dep aıyptaıtyn málimdeme tarady. Polıtsııa departamenti bul aqparatty joqqa shyǵaryp, resmı túsinikteme berdi.
19 qarashada áleýmettik jelilerde Mańǵystaý oblystyq polıtsııa departamentiniń basshysy men onyń orynbasarlary «uıymdasqan qylmystyq top qurdy» degen ujymdyq aryz tarady. Hatta birqatar basshyǵa bıýdjet qarjysyn jymqyrý, jalǵan qujattarǵa qol qoıǵyzý, tenderlerdi óz adamdaryna alyp berý sııaqty aýyr aıyptar taǵylǵan. Aryz avtorlary keshendi tekserý júrgizýdi suraǵan.
Mańǵystaý oblystyq polıtsııa departamentiniń baspasóz qyzmeti bul aqparatty tolyqtaı joqqa shyǵardy.
- Taraǵan aqparat shyndyqqa sáıkes kelmeıdi. Bul – feık. Jalǵan málimet taratý QR Qylmystyq kodeksiniń 274-babyna saı qylmystyq jaýapkershilikke ákeledi. Azamattardy tek resmı aqparatqa senýge shaqyramyz, - delingen habarlamada.
Sondaı-aq, polıtsııa departamenti jalǵan aqparat el arasynda dúrbeleń týǵyzatynyn, al mundaı áreketter qoǵamdyq qaýipsizdikke zııan tıgizetinin eskertti. Buǵan deıin Aqtaýda janarmaı quıý beketin tonaǵan kúdikti ustalǵan bolatyn.