Mańǵystaý polıtsııasy bastyǵy men dáriger ushaqta shetel azamatyn qutqardy
ASTANA. KAZINFORM — Mańǵystaý oblysy PD bastyǵy men dáriger ushaqta shetel azamatyn aman alyp qaldy. Bul týraly Polisia.kz jazdy.
23 aqpanda Astanadan Aqtaýǵa baǵyt alǵan áýe reısinde 45 jastaǵy sheteldik jolaýshynyń qan qysymy kúrt kóterilip, oǵan bortta bolǵan polıtsııa departamentiniń bastyǵy Saǵyndyq Aıaǵanov pen dáriger Tursyn Chýıshbaeva jedel kómek kórsetken.
Oqıǵa ushaq áýege kóterilgennen keıin shamamen bir saǵat ótken soń bolǵan. Mańǵystaý oblystyq polıtsııa departamentiniń bastyǵy Saǵyndyq Aıaǵanov ózin jaısyz sezingen Tájikstan Respýblıkasynyń azamaty dálizde qulap bara jatqanyn baıqap, dereý áreket etken. Ol jolaýshyny ustap qalyp, bortserikterdi shaqyrypty.
— Sol reıspen eńbek demalysymnan Aqtaýǵa ushyp kele jatqan edim. Er adamnyń ústime qaraı qulap kele jatqanyn baıqap, ustap qaldym. Bortserikterdi shaqyryp, jolaýshylar arasynan dáriger izdeı bastadyq. Baǵymyzǵa oraı, dáriger tabyla ketti. Ózimmen birge únemi aspırın alyp júretin edim, azamatqa sol dárini usyndym. Ushaq jerge qonǵansha azamattyń jaǵdaıyn baqylap otyrdyq. Jalpy mundaı jaǵdaıda kez kelgen adam kómekteser edi. Men muny azamattyq boryshym dep esepteımin, — dedi Saǵyndyq Aıaǵanov.
Jolaýshyǵa «Ana men bala» ortalyǵynyń dárigeri Tursyn Chýıshbaeva medıtsınalyq kómek kórsetken.
— Ushaqta er adamnyń qan qysymy 220/110-ǵa deıin kóterilgenin anyqtadyq. Dári berip, ottegi qosyp, jaǵdaıyn turaqtandyrdyq. Aqtaýǵa qonǵanǵa deıin qan qysymyn 135/85-ke deıin túsirdik. Jolaýshy basynyń samaı tusy «qaınaǵan sý quıǵandaı» aýyrǵanyn aıtty. Jolaýshylar arasynan kaptoprıl men aspırın tabyldy. Belgili bolǵandaı, ol bir aı buryn óz elinde osyndaı jaǵdaımen aýrýhanaǵa túsken, alaıda dáriger keńesin tolyq oryndamaǵan. Jazataıym oqıǵalardyń aldyn alý úshin sozylmaly aýrýy bar azamattar saparǵa shyqqanda qajetti dári-dármekterin ózimen birge alyp júrgeni abzal, — deıdi dáriger.
Ushaq Aqtaýǵa qonǵan soń jedel járdem qyzmeti naýqasty aýrýhanaǵa jetkizgen. Qazir onyń jaǵdaıy turaqty. Tájikstan azamaty ózine der kezinde kómek kórsetken jandarǵa alǵys bildirdi.
— Ushaq ushqannan keıin jaǵdaıym nasharlaı bastady. Bir saǵattan soń betimdi jýý úshin dárethanaǵa bettedim. Alaıda dárethanaǵa jetpeı, júregim álsirep, sol jaq denem jansyzdanǵandaı boldy. Kózim qaraýytyp, tynys alý qıyndady. Sol sátte aldyńǵy qatarǵa qaraı qulappyn. Maǵan kómektesken adamnyń Mańǵystaý oblystyq polıtsııa departamentiniń bastyǵy ekenin keıin bildim. Onyń maǵan sý berip, sabyrǵa shaqyryp jatqany esimde. Esimdi jıǵan soń men ol kisiden keshirim suradym. Ol «eshteńe etpeıdi, bárimiz adambyz ǵoı, kómektesý paryzymyz». Ushaq bortynda kómek kórsetken barshaǵa sheksiz rızamyn, — dedi.
45 jastaǵy azamat aldaǵy ýaqytta ózine kómek kórsetken mamandarǵa jeke alǵys bildirip, iltıpat bildirgisi keletinin jetkizdi.
Eske sala keteıik, buǵan deıin Densaýlyq saqtaý mınıstri Aqmaral Álnazarova ushaqta esinen tanyp qalǵan jolaýshyǵa alǵashqy medıtsınalyq kómek kórsetkenin jazǵan edik.