Mańǵystaý oblystyq TJD 1,3 mıllıard teńgeniń tehnıkasyn satyp almaq
AQTAÝ. KAZINFORM – Mańǵystaý oblystyq tótenshe jaǵdaılar departamentiniń bastyǵy Murat Muhanov 1 órt sóndirý kóligin 1,3 mıllıard teńgege satyp almaqshy. Avtokólikti «Rolls-Royce» kompanııasy shyǵarǵan. Bul týraly memlekettik satyp alý saıtynda jarııalandy.
Osyǵan oraı, tótenshe jaǵdaılar departamenti jazba jarııalady. Aqtaýda kóp qabatty ǵımarat kóp bolǵandyqtan, bıik ári zamanaýı avtosatyǵa qajettilik týyndaǵan.
- Aqtaý qalasynda kópqabatty ǵımarattardyń kóbeıýine baılanysty adamdardy joǵarǵy qabattardan qutqarýǵa jáne evakýatsııalaýǵa, órtterdi sóndirýge jáne basqa da tótenshe jaǵdaılar kezinde, bıik ǵımarattarda avarııalyq — qutqarý jumystaryn júrgizýge arnalǵan arnaıy órt tehnıkasyn - avtosatyny satyp alý óte qajet. Tótenshe jaǵdaılar mınıstriniń buıryǵyna sáıkes, Aqtaý qalasyna uzyndyǵy 50 metrden asatyn 2 avtosaty alý qajet, - delingen habarlamada.
Búginde oblysta 35 metrge deıingi 10 tehnıka jáne 54 metrge deıingi 1 ǵana tehnıka bar. Sonyń 3-eýi normatıvtik merzimnen asyp, 15 jyldan astam ýaqyttan beri paıdalanylyp keledi. Osyǵan baılanysty, zamanaýı úlgidegi avtosatylardy satyp alý qajettiligi týyndaǵan. Kópfýnktsıonaldy arnaıy tehnıka - qutqarý jumystaryn jedeldetý úshin jyljymaly lıftpen, órtti sóndirý úshin turaqty sý berýge arnalǵan lafettik oqpanmen, túngi ýaqytta qutqarý-evakýatsııalaý jumystaryn júrgizýge arnalǵan jaryqtandyrý qurylǵysymen, zembilmen jáne avarııalyq-qutqarý quraldarymen jumys isteý úshin qajet 220-380 V qýat kózimen jabdyqtalǵan.
- Alaıda otandyq óndirýshiler mundaı avtokólik satylaryn óndirmeıtindikten, tehnıkany sheteldik óndirýshilerden satyp alý josparlanýda. Bul qala turǵyndarynyń qaýipsizdigin saqtap, tótenshe jaǵdaılarda jedel is-qımyl jasaýǵa múmkindik beredi. Sondyqtan básekelestik ortadaǵy memlekettik satyp alý portalynda óndirýshiler usynǵan baǵaǵa sáıkes, arnaıy avtosatylardyń baǵasy jarııalandy, - delingen habarlamada.
Buǵan deıin, Aqtaýda aıaldamada zańsyz qurylys salynyp jatqany týraly jazǵan bolatynbyz.