Mańǵystaý oblysynyń turaqtandyrý qorynda 572 tonna azyq-túlik bar

AQTAÝ. KAZINFORM – Turaqtandyrý qoryndaǵy azyq-túlik Aqtaý qalasyndaǵy óndiristik-logıstıkalyq ortalyqtyń arnaıy qoımalarynda saqtalǵan.

Atap aıtqanda, qorda 452 tonna 200 keli qant, 70 tonna kúrish, 40 myń lıtr eki túrli suıyq maı, 64 tonna tuz, 25 tonnadaı qaraqumyq, 45 tonna makaron bar. 

Qordaǵy azyq-túliktiń jalpy quny — 244 mıllıon 300 myń teńge. Qazirgi tańda turaqtandyrý qoryndaǵy taýarlardy saýda oryndaryna satý baǵasy bekitilgen. Máselen, qanttyń kelisi — 350 teńge, kúrish — 350 teńge, suıyq maı («shedevr») — 660 teńge, suıyq maı («oleına») — 560 teńge, Aral tuzy — 65 teńge, qaraqumyq — 180 teńge, makaron — 260 teńge. 

Mamandardyń aıtýynsha, bul taýarlar áleýmettik mańyzy bar azyq-túlik taýarlaryna baǵa ósimi bolǵan jaǵdaıda, saýda oryndaryna joǵaryda kórsetilgen baǵada ótkiziledi. Ary qaraı saýda oryndary da bekitilgen baǵada satady. Mysaly, qanttyń bekitilgen satý baǵasy — 380 teńge, kúrish — 385 teńge, suıyq maı («shedevr») — 720 teńge, Aral tuzy — 70 teńge, qaraqumyq — 198 teńge, makaron — 285 teńge. 

— Turaqtandyrý korynda uzaq merzimdi saqtaýǵa bolatyn taýarlardy saqtaımyz. Qalǵan kókenisterdi, jumyrtqa, taýyq eti sııaqty azyq-túlikti aınalym mehanızmi boıynsha kásipkerlerge qajet kezde ǵana satyp alamyz. Qordaǵy taýarlar shamamen jyl sońyna deıin jetedi. Azaıyp jatsa, qosymsha aldyramyz, — deıdi oblystyq kásipkerlik jáne saýda basqarmasynan. 

Buǵan deıin Aqtaýda tutynýshylardyń quqyqtaryn buzǵany úshin iri saýda jelisine aıyppul salynǵany týraly jazǵan bolatynbyz.