Mańǵystaý oblysynyń eks-ákimi Nurlan Noǵaev nesimen este qaldy
AQTAÝ. KAZINFORM – Kúni keshe Nurlan Noǵaev Mańǵystaý oblysynyń ákimi laýazymynan bosatyldy. Ol ákim bolǵan 2 jyl 8 aıda Qańtar oqıǵasy, eńbek daýlary men Mańǵystaý atom energetıkalyq kombınatynda apatty jaǵdaılar boldy.
Noǵaev Mańǵystaýǵa ákim bolyp taǵaıyndalǵannan keıin úsh aı ótken soń oblysta narazylyq bastaldy. Turǵyndar suıytylǵan gazdyń qymbattaýyna qarsy shyqty. Jańaózen qalasynda bastalǵan mıtıng búkil oblysty qamtydy. Ózge óńirlerdegi tártipsizdikterge ulasty. Alaıda Qazaqstannyń basqa óńirlerinen aıyrmashylyǵy – Mańǵystaýda ólim-jitim tirkelmedi, nysandarǵa shabýyl jasalǵan joq. Narazylyq bildirgen turǵyndarmen kelissóz birneshe kúnge sozyldy.
Oblysty Nurlan Noǵaev basqarǵan kezdegi aldyńǵy qatarly jańalyqtyń biri – Mańǵystaý atom energetıkalyq kombınaty ákimdiktiń balansyna ótkizildi. Bul mańyzdy jáne der kezinde qabyldanǵan sheshim boldy. Óıtkeni, kásiporynda apatty oqıǵalar jıilep ketken-di. Osy kezde jergilikti bılik aqsha bólip, kásiporyn men ınjenerlik jelilerdi jańǵyrtý bastaldy.
Aımaqtaǵy ózekti máselelerdiń biri – aýyz sý tapshylyǵy bolsa, Noǵaev ákim bolǵan kezinde osy baǵytta 9 joba qolǵa alyndy. Jalpy qýattylyǵy táýligine 286 myń tekshe metr sý bolatyn bul jobalardy júzege asyrý áli de kezeń-kezeńimen júrip jatyr.
Burynnan halyqpen kezdesýden qalys qalmaıtyn sheneýnik retinde belgili Nurlan Noǵaev oblystyń barlyq aýdanyn birneshe ret aralap, 120-dan astam kezdesý ótkizgen. Turǵyndar ákimniń sol kezdesýlerdiń barlyǵynda 5-6 saǵattan otyryp, sońǵy suraqqa deıin jaýap beretinin baıqady.
Nurlan Noǵaevtyń Mańǵystaýǵa kelgendegi alǵashqy buıryǵynyń biri – turǵyndar úshin Telegram chatyn qurý bolǵan. Onda óziniń orynbasarlarynan bastap, kommýnaldyq kásiporyndardyń basshylary turǵyndardyń suraqtaryna jaýap berip otyrdy.
Sondaı-aq bul ákimniń tusynda oblysta avtobýs parki jańartyldy. 3 jyldyń ishinde Mańǵystaýda 178 jańa avtobýs paıda boldy, onyń 120-sy metanmen júredi. Oblys ortalyǵynan aýdan-qalalarǵa qoǵamdyq kólikter qatynaı bastady.
Mańǵystaýda zańsyz qurylystardy toqtatý jumystary da qolǵa alyndy. Byltyr sot arqyly 5 ǵımarat buzyldy. Sonymen qatar keıingi úsh jylǵa jýyq ýaqyt ishinde 3 mln gektardan astam jer memleket menshigine qaıtaryldy.
Aıta ketsek, Nurlan Noǵaev Mańǵystaý oblysynyń ákimi bolyp Serikbaı Trumovtyń ornyna kelgen edi. Búgin bul laýazymǵa Nurdáýlet Qılybaı taǵaıyndaldy.
