Mańǵystaý oblysyndaǵy aýyldardyń birinde aýyz sýǵa shekteý engizildi

AQTAÝ. KAZINFORM – Bul týraly Quryq aýyly ákimdiginiń áleýmettik jelidegi resmı paraqshasynda jarııalandy.  

Qaraqııa aýdany ákimdigi baspasóz qyzmetiniń habarlaýynsha, qazirgi tańda Quryq aýylyna aýyz sý «Kaspıı» sý tuşytý zaýytynan únemdelgen rejımde jetkizilip jatyr. Aqtaý qalasynan aýylǵa saǵatyna 83 tekshe metr sý keledi. Sonymen qatar aýylda 1 978 tekshe metr kóleminde buryn jınaqtalǵan sý qory bar.

– Osy qordy tıimdi paıdalaný jáne turaqty sýmen qamtamasyz etý maqsatynda, aýyz sý tańǵy saǵat 09:00-den túngi 23:00-ge deıin sorǵy (nasos) arqyly berilýde. Túngi ýaqytta sorǵy (nasos) ajyratylyp, tıisti qudyqtarǵa sý jınaý jumystary júrgiziledi. Bul jumystar Qaraqııa stantsııasy jáne Appaq eldi mekenderin de aýyz sýmen qamtý qajettiligine baılanysty júzege asyrylyp otyr, - delingen habarlamada.

Sondaı-aq sorǵy belgili bir ýaqyttarda qosylatyndyqtan, qubyr ishiniń tolyq tolmaýy baıqalyp, keıbir kóshelerge sý keshigip jetýi múmkin. 

– Osyǵan oraı ákimdik turǵyndardan qalyptasqan jaǵdaıǵa túsinistikpen qarap, aýyz sýdy únemdep paıdalanýdy suraıdy, - deıdi aýdan ákimdiginiń baspasóz qyzmeti.

Buǵan deıin Mańǵystaýda «QazAzot» zaýytyndaǵy tótenshe oqıǵadan zardap shekken 2 jumysshynyń jansaqtaý bóliminde jatqanyn jazǵan bolatynbyz.