Mańǵystaý oblysynda bilim berý salasynyń 185 mamany jaýapqa tartyldy
AQTAÝ. KAZINFORM - 27 naýryzda oblys prokýrorynyń tóraǵalyǵymen orta bilim berý uıymdarynyń qyzmetine júrgizilgen tekserýlerdiń nátıjeleri boıynsha alqa otyrysy ótti. Bul týraly oblystyq prokýratýranyń baspasóz qyzmeti málimdedi.
Alqa otyrysyna múddeli memlekettik organdardyń basshylary men bala quqyǵy jónindegi ýákil, sondaı-aq basqa da sala mamandary qatysty.
Tekserý nátıjesinde 40 myńnan astam oqýshy men muǵalim quqyǵy, onyń ishinde 5 myńnan astam adamnyń konstıtýtsııalyq quqyǵy qorǵaldy.
Sonymen qatar 50-den astam zańdylyqtyń buzylýyn joıý týraly usynys engizilip, 185 adam ártúrli jaýapkershilikke tartyldy.
Atap aıtqanda, tekserýler barysynda halyqtyń sanıtarlyq–epıdemıologııalyq salaýattylyǵy salasyndaǵy buzýshylyqtar anyqtalyp, SES qorytyndysyn berý kezinde zańnama talaptaryn saqtamaý, jalǵan medıtsınalyq kitapshalardy paıdalaný faktileri anyqtaldy.
«Birqatar bilim berý uıymdarynda bastaýysh synyptarǵa arnalǵan tegin tamaqtaný máziriniń zańnama talaptaryna sáıkes emestigi anyqtaldy. Memlekettik satyp alý salasynda Aqtaý qalasynyń 22 bilim berý uıymynda bir kózden jalpy somasy 180 mln teńgege tehnıkalyq sıpattamalarǵa sáıkes kelmeıtin týrnıketter satyp alynǵan. Sonymen birge mektepterde órt qaýipsizdigi talaptaryn saqtaý, qaýipsizdikti uıymdastyrý jáne medıtsınalyq pýnkterdiń jumysy salasyndaǵy zań buzýshylyqtar anyqtaldy» - delingen habarlamada.
Alqa otyrysynda oqýshylardyń qaýipsizdigin arttyrýǵa, bilim sapasy men balalardyń quqyǵyn qorǵaýǵa basymdyq berý týraly sheshim qabyldanyp, osy saladaǵy quqyqbuzýshylyqtyń aldyn alý boıynsha birqatar shara usynyldy.
