Mańǵystaý oblysynda veterınarııa salasynyń qyzmetkerlerine 53 jańa avtokólik tabystaldy
AQTAÝ. KAZINFORM — 5 qyrkúıekte Mańǵystaý oblysynda veterınarııalyq qyzmettiń jumysyn jetildirý, múmkindikterin arttyrý, maqsatynda jańa qyzmettik avtokólikter saltanatty túrde tabystaldy.
Jergilikti bıýdjet qarajaty esebinen 1 mlrd teńge bólinip, jol talǵamaıtyn 53 kólik, tońazytqyshtar, kompıýterler jáne oǵan qajetti qurylǵylar satyp alyndy.
Bul shara Memleket basshysynyń veterınarııalyq júıeni jańǵyrtý jónindegi tapsyrmalaryn iske asyrý aıasynda júzege asyrylyp otyr. Sonymen qatar, veterınarııa salasynyń kadrlyq áleýetin nyǵaıtyp, aýyldyq jerlerdegi halyqtyń veterınarııalyq kómekke qoljetimdiligin arttyrýǵa múmkindik beredi.
Oblysta sońǵy jyldary veterınarııa salasyn jetildirýge memleket tarapynan úlken qoldaý kórsetilip keledi. 2022-2025 jyldary veterınar mamandardyń jalaqysy eki esege artty, al keler jyldan bastap eńbekaqyny taǵy 150 paıyzǵa kóterý josparlanyp otyr.
Budan bólek, bıyl oblys boıynsha jańadan 43 veterınarııalyq pýnkt pen 1 stantsııa salynyp jatyr. Sonymen qatar, 2 stantsııa tolyq jóndeýden ótpek. Jańa nysandar jyl aıaǵyna deıin aıaqtalady dep josparlanǵan.
Óz sózinde Nurdáýlet Qılybaı Memleket basshysynyń tapsyrmalaryna sáıkes óńirdiń veterınarııa salasynda júıeli jumystar atqarylyp jatqanyn atap ótti.
— Memleket Basshysy Qasym-Jomart Kemeluly Toqaev Qazaqstan halqyna Joldaýynda Veterınarııa — memlekettiń bıologııalyq qaýipsizdik júıesiniń bir bóligi ekenin atap ótti, salany jetildirý jóninde tapsyrma bergen bolatyn. Tapsyrmaǵa sáıkes aǵymdaǵy jyldyń 2 — toqsanynda Mańǵystaý oblysynyń veterınarııa basqarmasy derbes basqarma retinde qurylyp, birshama jumystar atqaryldy tehnıkalyq baza nyǵaıtylyp jatyr. Endi sizderge tabystalyp otyrǵan jańa avtokólikter jumys sapasyn arttyryp, el ıgiligi úshin qyzmet etýge zor múmkindik beredi, — dedi Nurdáýlet Qılybaı.