Mańǵystaý oblysynda TJM qutqarýshylary 29 júk kóligin qar qursaýynan alyp shyqty

TALDYQORǴAN.KAZINFORM - Mańǵystaý oblysynda respýblıkalyq mańyzy bar avtojol ýchaskesinde  qalǵan júk kólikterin qutqarýshylar qalyń qardan súırep shyǵardy.

TJM taratqan málimetke súıensek «Jańaózen – Túrikmenstan» jolynyń boıynda júk kólikteri qar úıindisinde qalǵan. Júk kólikteriniń biri tipti kúre joldyń boıynan shyǵyp ketken.

Júrgizýshilerge kómekke kelgen aımaqtyq qutqarý bólimsheleriniń qyzmetkerleri dereý joldy tazalap, kólikterdi súırep, qozǵalysty qalpyna keltirgen. Bul jumystar «QazAvtojol» qyzmetkerlerimen birlesip júrgizilgen.

TJM daýyldy eskertýlerge nazar aýdaryp, aýa raıy nasharlaǵan jaǵdaıda úıde bolýǵa shaqyrady.

Eske salaıyq, buǵan deıin Qostanaı oblysynda kólik qozǵalysyna shekteý qoıylǵanyn jazǵanbyz.