Mańǵystaý oblysynda «Torysh» tastary erekshe qorǵalatyn tabıǵı aýmaǵy qurylýy múmkin
Mańǵystaý oblysynda «Torysh» tastary jergilikti mańyzy bar erekshe qorǵalatyn tabıǵı aýmaǵy qurylýy múmkin. Bul jaıynda Senat depýtattarynyń saýalyna Premr-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.
«Erekshe qorǵalatyn tabıǵı aýmaqtar týraly» QR Zańyna sáıkes erekshe qorǵalatyn tabıǵı aýmaq – erekshe qorǵaý rejımi belgilengen memlekettik tabıǵı-qoryq qorynyń tabıǵı keshenderi men obektileri bar jer ýchaskeleri, sý obektileri men olardyń ústindegi áýe keńistigi. «Torysh» tastary memlekettik tabıǵı-qoryq qory obektileriniń osy túrleriniń eshqaısysyna jatpaıtynyn atap ótý qajet», - dedi Úkimet basshysy jaýabynda.
Premer-Mınıstrdiń túsindirýinshe, Zańnyń 10-babyna sáıkes oblystardyń, respýblıkalyq mańyzy bar qalalardyń, astananyń jergilikti atqarýshy organdary óz quzyreti sheginde respýblıkalyq mańyzy bar memlekettik tabıǵı-qoryq qory obektileriniń tizbesi, erekshe qorǵalatyn tabıǵı aýmaqtar júıesi men ekologııalyq jelilerdi damytý, respýblıkalyq jáne jergilikti mańyzy bar erekshe qorǵalatyn tabıǵı aýmaqtardy qurý jáne keńeıtý jónindegi usynystardy ýákiletti organǵa engizedi.
Zańnyń 11-babyna sáıkes jergilikti atqarýshy organ tarıhı-mádenı mura obektilerin anyqtaýdy, esepke alýdy, saqtaýdy, zerdeleýdi, paıdalanýdy jáne olardyń jaı-kúıin monıtorıngileýdi qamtamasyz etedi. Sondaı-aq ýákiletti organmen kelisý boıynsha tarıhı-mádenı mura obektilerin tarıhı-mádenı saraptama qorytyndysy negizinde jergilikti mańyzy bar tarıh jáne mádenıet eskertkishteri dep tanıdy jáne olardy Jergilikti mańyzy bar tarıh jáne mádenıet eskertkishteriniń memlekettik tizimine qosady.
Anyqtalǵan tarıhı-mádenı mura obektilerin oblystardyń, respýblıkalyq mańyzy bar qalalardyń, astananyń jergilikti atqarýshy organdary aldyn ala esepke alý tizimine engizedi. Olardyń mártebesi týraly túpkilikti sheshim qabyldanǵanǵa deıin Zańǵa sáıkes tarıh jáne mádenıet eskertkishterimen birdeı qorǵalýǵa jatady.
«Osyǵan baılanysty, Mańǵystaý oblysynyń ákimdigi ǵylymı mamandandyrylǵan uıymdarmen birlesip, «Torysh» tastarynyń biregeıligin, mańyzdylyǵyn aıqyndaý úshin ǵylymı zertteýler júrgizetin jáne olardy memlekettik tabıǵı-qoryq qorynyń nemese tarıhı-mádenı muranyń obektisine jatqyzý úshin negizdememen múddeli organdarǵa usynys engizetin bolady. «Torysh» tastaryn memlekettik tabıǵı-qoryq qorynyń obektisine jatqyzǵan jaǵdaıda túri jaratylystaný-ǵylymı negizdemesimen aıqyndalatyn bolashaqta jergilikti mańyzy bar erekshe qorǵalatyn tabıǵı aýmaqty qurý múmkin bolady», - dedi Álıhan Smaıylov.
