Mańǵystaý oblysynda tek shetel azamattaryna arnalǵan kazıno ashylmaq

ASTANA. KAZINFORM — Oblys ákimi Nurdáýlet Qılybaıdyń aıtýynsha, kazınoǵa Qazaqstan azamattarynyń barýyna ruqsat berilmeıdi.

— Oıynhanaǵa tek sheteldik tólqujatpen kire alady. Mundaı tájirıbe bar. Mysaly, jalaqy alyp, sosyn oıynhanaǵa baryp utylyp qaldyńyz, árıne renishti. Bul kimge kerek? Bizdiń maqsat shetelden keletin adam Qazaqstan ekonomıkasyna aqsha qaldyryp ketýi kerek, — dedi Nurdáýlet Qılybaı ortalyq kommýnıkatsııalar qyzmeti alańynda ótken baspasóz máslıhatynda.

Osylaısha ákim tabystyń syrttan kelgenin qalap otyr. 

— Tek kazıno emes, meıramhana nemese qonaq úı qurylysyna sheteldikter, qazaqstandyqtar ınvestıtsııa sala alady. Bastysy ınvestıtsııa salyp, ekonomıkamyzǵa úles qossa bolǵany. Ázirge (kazıno — avtor) zań shyqqan joq, bul bizdiń usynys, — deıdi óńir basshysy.

Odan bólek, N. Qılybaı baıandamasynda «Kendirli» kýrorttyq aımaǵynda oıyn-saýyq týrızmin damytý týraly aıtyp qaldy.

— Prezıdent óz Joldaýynda «Kendirli» kýrorttyq aımaǵynyń potentsıalyn odan ári damytý qajet ekenin atap ótti. Qazir kýrorttyq aımaqtyń bas jospary ázirlendi. Biz Kendirliniń damýyna oń serpin berý úshin dástúrli jaǵajaı jáne eko-týrızmnen bólek «oıyn-saýyq týrızmi sııaqty qosymsha baǵytty da damytý jón dep esepteımiz. Búginde bul baǵytta múddeli organdarmen pysyqtaý jumystary júrgizilýde, — dep tolyqtyrdy Mańǵystaý ákimi.

Buǵan deıin Aqtaýdy Baký men Dýbaı qalalarynyń úlgisi boıynsha damytý úshin bas josparǵa ózgeris engizilgenin habarlaǵan edik.