Mańǵystaý oblysynda sharýashylyq saraıynyń edeni opyrylyp, 10 adam jertólege qulap ketti
AQTAÝ. KAZINFORM – Tótenshe oqıǵa Saıyn Shapaǵatov aýylyndaǵy sharýashylyq qurylystarynyń birinde boldy. Saraıdyń edeni opyrylyp, adamdar jertólege qulap ketken.
Túpqaraǵan aýdandyq ákimdiginiń málimetinshe, oqıǵa 15 mamyr kúni keshke bolǵan. Jeke turǵyn úı aýlasynda ornalasqan saraıdyń edeni qulaǵan. Sol sátte ishinde 10 adam bolǵan. Olardyń ekeýi túrli dene jaraqatymen aýrýhanaǵa jetkizildi. Qalǵandarynyń jaǵdaıy turaqty, úılerine jiberilgen.
– Atalǵan derek boıynsha quzyrly organdar tekserý jumystaryn júrgizip jatyr, - dep habarlady ákimdik.
Mańǵystaý oblystyq aýrýhanasy baspasóz qyzmetiniń habarlaýynsha, aýrýhananyń qabyldaý bólimine 9 adam jetkizilgen, olardyń ekeýi neırohırýrgııa bólimine jatqyzyldy.
– Neırohırýrgııa bólimine túsken 39 jastaǵy áıel bas-mı jaraqatyn alǵan. Al 35 jastaǵy áıeldiń moıyn omyrtqasy jabyq synǵany anyqtaldy. Olar dárigerlerdiń baqylaýyna alyndy. Sonymen qatar osy oqıǵadan zardap shekken taǵy 7 adamǵa medıtsınalyq kómek kórsetilip, ambýlatorııalyq em alýǵa jiberildi, - delingen habarlamada.
Eske sala keteıik, buǵan deıin mańǵystaýlyq dáriger bas súıegi synyp, mıy janshylǵan balany aman alyp qalǵan bolatyn.
