Mańǵystaý oblysynda shaǵyn munaı óńdeý zaýytyn salý kerek — senator

ASTANA. KAZINFORM — Búgin Senattyń jalpy otyrysynda depýtat Súıindik Aldashev Úkimetke Mańǵystaý oblysynda shaǵyn munaı óńdeý zaýytyn salý usynysyn aıtty. 

— Qazirgi kezde áýe kóligimen tasymal salasynda sheshimin tappaı kele jatqan másele — elimizdegi avıaotynnyń tapshylyǵy. Bul óz kezeginde tasymal qunyn arttyryp, aımaqtyń áýe qatynasynyń básekege qabilettiligin tómendetip otyr. Qymbat avıaotynǵa baılanysty kóptegen halyqaralyq reıs ekonomıkalyq turǵyda tıimsiz boldy. Sonyń saldarynan avıatsııalyq logıstıkany qajet deńgeıde damytý múmkin bolmaı otyr. Bul jaǵdaı óńirlik jáne halyqaralyq saýdany shektep, týrızm aǵymyn arttyrýǵa kedergi, — dedi Súıindik Aldashev Úkimet basshysynyń atyna joldaǵan depýtattyq saýalynda.

Onyń aıtýynsha, resmı derekterge sáıkes, Qazaqstanda jylyna 650-700 myń tonna avıatsııalyq kerosın shyǵarylyp, 1 mln tonnaǵa jýyq otyn tutynylady. Osy oraıda 350 myń tonnadan astam otyn Reseı jáne basqa da elderden jetkiziledi.

— Al bolashaqta josparlanǵan Mańǵystaý oblysyndaǵy avıatsııalyq hab qurylysy júzege asqan kezde, óńirde avıaotyn tutyný kólemi qazirgi 15 myń tonnadan 120-130 myń tonnaǵa deıin kóbeıýi múmkin. Budan basqa, dızel otyny men benzın sııaqty janar-jaǵarmaıdyń tapshylyǵyna baılanysty keleshekte bolýy múmkin táýekelder óńir áleýetin arttyrý jolyndaǵy jospardy oryndamaý qaýpin týdyrýy yqtımal. Bul rette, Úkimettiń bolashaqta josparlanǵan Shymkent munaı óńdeý zaýytynyń ónimin ulǵaıtý arqyly munaıly Mańǵystaý oblysynyń janar-jaǵarmaıǵa tapshylyǵyn joıamyz degen jospary atalǵan ónimderdiń qymbattaýyna ákep soǵady degen kúdik bar. Aıta ketsek, qazir óńirde jylyna 1,5 mln tonna munaıdan 700 myń tonna bıtým shyǵaratyn Aqtaý bıtým zaýyty jumys istep tur. Sol munaıdyń bıtýmnan basqa jeńil fraktsııalary óńdelmeı, shıkizat retinde syrtqa jóneltilip otyr, — dedi senator.

Onyń paıymynsha, Mańǵystaý oblysyn arzan munaı ónimderimen qamtamasyz etý maqsatynda shaǵyn, qýaty jylyna 5 mln tonnaǵa deıingi munaı óńdeý zaýytynyń qurylysy strategııalyq mańyzdy qadam bolmaq.

— Shaǵyn MÓZ óńirdiń energetıkalyq qaýipsizdigin arttyryp, ımporttyq munaı ónimderine táýeldiligin azaıtyp, janarmaıdyń logıstıkalyq shyǵyndaryn qysqartady. Sondyqtan Mańǵystaý oblysynda shaǵyn munaı óńdeý zaýytyn salý jobasyna qoldaý kórsetýdi óńirdiń keshendi damýy men logıstıkalyq ınfraqurylymyn jańartýdyń mańyzdy áreketi retinde qarastyrýdy suraımyz, — dedi depýtat. 

Buǵan deıin tórtinshi munaı óńdeý zaýytynyń qurylysy nege 2030 jylǵa shegerilgenin jazǵan edik.