Mańǵystaý oblysynda ortalyq aýrýhana qaıtarylǵan aktıvter esebinen jóndelip jatyr

AQTAÝ. KAZINFORM — Beıneý aýdanynda kópsalaly ortalyq aýdandyq aýrýhananyń ǵımaratynda aýqymdy kúrdeli jóndeý jobasy bastaldy. Bul týraly Mańǵystaý oblysynyń prokýratýrasynyń baspasóz qyzmeti habarlady. 

Medıtsınalyq uıym 170-ten astam tósek-orynǵa eseptelgen jáne jyl saıyn 320 myńnan astam naýqasty qabyldaıdy.

Joba prokýratýra organdary qabyldaǵan sharalardyń nátıjesinde memleketke qaıtarylǵan aktıvter esebinen júzege asyrylyp jatyr.

— Búgingi kúni aýdandyq aýrýhana halyqtyń shuǵyl jáne mamandandyrylǵan medıtsınalyq kómekke degen qajettiligin tolyq kólemde qamtamasyz ete almaı otyr, sonyń saldarynan naýqastar iri qalalarǵa júginýge májbúr.

2025 jyldyń 1 qańtaryndaǵy halyq sanaǵy boıynsha aýdanda 68 myńnan astam adam turady.

Aýdan turǵyndary úshin der kezinde jáne sapaly medıtsınalyq kómekke qol jetkizý erekshe mańyzdy. Halyq sanynyń ósýin jáne aýdannyń qarqyndy damýyn eskere otyryp, mekemeni jańǵyrtý týraly sheshim qabyldandy, — delingen habarlamada.

Joba aıasynda ǵımarattarǵa kúrdeli jóndeý júrgizý jáne qaıta jańartý, jańa qurylystar salý, mamandandyrylǵan bólimsheler ashý, sondaı-aq zamanaýı medıtsınalyq jabdyqtarmen qamtamasyz etý kózdelgen: kompıýterlik jáne magnıttik-rezonanstyq tomograftar, angıograftar, eksperttik deńgeıdegi ÝDZ apparattary, reanımatsııa jáne operatsııalyq bloktarǵa arnalǵan qural-jabdyqtar.

— Jańartylǵan aýrýhanada ınsýlttik jáne kardıologııalyq ortalyqtar, medıtsınalyq ońaltý, travmatologııa jáne ortopedııa bólimderi, sondaı-aq basqa da mamandandyrylǵan qyzmetter ashylady, qabyldaý bólimi trıaj júıesimen jabdyqtalady, — delingen Mańǵystaý oblysynyń prokýratýrasy habarlamasynda.

Bul jobany júzege asyrý aýdannyń jáne kórshiles eldi mekenderdiń turǵyndaryn zamanaýı deńgeıdegi qoljetimdi jáne sapaly medıtsınalyq kómekpen qamtamasyz etýge múmkindik beredi.

Jobanyń oryndalý barysy Mańǵystaý oblysy prokýratýrasynyń baqylaýynda. 

Aıta ketelik Aqmola oblysynda sýmen jabdyqtaý jelilerin salýǵa zańsyz aktıvter esebinen 21,5 mlrd teńge bólingen edi.