Mańǵystaý oblysynda nóser jaýynnan keıin aýyl kóshelerin sý basty
AQTAÝ. KAZINFORM — Mańǵystaý oblysy Túpqaraǵan aýdanyndaǵy Taýshyq aýylynda jaýǵan jańbyrdan keıin kóshelerdi sý basyp, ekpindi sý aǵyny júrgen. Áleýmettik jelide taraǵan beınejazbada eldi meken aýmaǵymen aqqan nóser sýynyń joldardy shaıyp jatqanyn kórýge bolady.
Taýshyq aýylynyń ákimi Nurjan Baqtybaevtyń aıtýynsha, qatty nóser jaýyn shamamen segiz mınýtqa sozylǵan. Jaýyn-shashyn kóp mólsherde túngi saǵat 01:00-den 02:00 aralyǵynda jáne tańǵy saǵat 10 da jaýǵan. Degenmen, tótenshe jaǵdaı tirkelmegen.
-Turǵyndardan eshqandaı shaǵym túsken joq. Úılerdi sý basý nemese shatyrlardyń búliný jaǵdaıy tirkelgen joq. Negizgi sý aǵyny teńiz baǵytyna qaraı ketti. Qazirgi ýaqytta eldi mekendegi jaǵdaı turaqty, - deıdi aýyl ákimi.
Buǵan deıin, Naızaǵaı, nóser jańbyr: 15 maýsymda bes óńirde +39°C ystyq bolatyny habarlanǵan bolatyn.
