Mańǵystaý oblysynda mekteptiń akt zalynyń tóbesi qulady
AQTAÝ. KAZINFORM – 23 shildede tańǵy saǵat 6:30 shamasynda Mańǵystaý oblysy Qaraqııa aýdanynyń Quryq aýylyndaǵy jalpy bilim beretin mektep-gımnazııanyń akt zalynyń tóbesi qulady.
Qaraqııa aýdany ákimi baspasóz qyzmetiniń dereginshe, apat saldarynan eshkim zardap shekken joq. Qulaǵan tóbe jabyny shamamen 250 sharshy metr aýmaqty qamtyǵan.
- Qazirgi ýaqytta oqıǵa ornyna arnaıy mamandar shaqyrylyp, tıisti tekseris pen saraptama jumystary júrgizilip jatyr, - delingen aqparatta.
Atalǵan mektep 2009 jyldyń qyrkúıek aıynda paıdalanýǵa berilgen, 1200 oqýshyǵa arnalǵan.
- Oqıǵaǵa baılanysty arnaıy komıssııa quryldy. Tolyq saraptama nátıjeleri men jóndeý jumystary týraly qosymsha aqparat keıinirek habarlanatyn bolady, - dep málimdedi derekkózden.
Aıta keteıik, Mańǵystaý oblysyndaǵy aýyldardyń birinde aýyz sýǵa shekteý engizildi.