Mańǵystaý oblysynda kólik júksalǵyshynan 136 keli bekire tabyldy
ASTANA. KAZINFORM — Mańǵystaý oblysynda polıtsııa Chevrolet Cobalt kóligin tekserý kezinde 136 keliden astam bekire tuqymdas balyq tárkiledi.
Oqıǵa 5 qazanda Qaraqııa aýdanynda bolǵan. Polıtsııa qyzmetkerleri basqa da quqyq qorǵaý jáne ýákiletti organdar ókilderimen birlesip, kólikti toqtatqan.
Júksalǵyshty tekserý kezinde bekire tuqymdas balyqqa uqsas 22 dana balyq tabylǵan. Olardyń jalpy salmaǵy 136,15 keli boldy.
Polıtsııanyń málimetinshe, balyq kólikte otyrǵan 55 jastaǵy áıel jolaýshyǵa tıesili bolǵan.
— Osy fakti boıynsha Qazaqstan Respýblıkasy Qylmystyq kodeksiniń 339-baby 1-bóligimen sotqa deıingi tergeý bastaldy. Qazir tárkilengen balyqtyń qaıdan shyqqany jáne oqıǵanyń barlyq mán-jaıy anyqtalyp jatyr, — dep habarlady polıtsııa.
Polıtsııa sırek kezdesetin jáne joıylyp ketý qaýpi tóngen janýarlar túrlerin zańsyz aýlaý, satyp alý, saqtaý, tasymaldaý jáne ótkizý qylmystyq jaýapkershilikke ákeletinin eskertti.
Eske salaıyq, buǵan deıin Túrkistan oblysynda zańsyz aýlanǵan 260 keliden astam balyq tárkilengenin habarlaǵan edik.
