Mańǵystaý oblysynda qyzylsha juqtyrǵandar sany kóbeıdi
AQTAÝ. KAZINFORM — Mańǵystaý oblysynda qyzylsha juqtyrǵandar sany artyp otyr. Jyl basynan beri óńirde aýrýǵa kúdikpen 440 jaǵdaı tirkelip, onyń 299-y zerthanalyq jolmen rastalǵan. Bul týraly óńirlik sanıtarııalyq-epıdemıologııalyq baqylaý departamenti málimdedi.
Mamandardyń aıtýynsha, aýrýshańdyq kórsetkishi 100 myń turǵynǵa shaqqanda 36,4 jaǵdaıdy quraıdy. Byltyrǵy jyldyń osy kezeńimen salystyrǵanda naýqastar sany edáýir ósken.
Infektsııa ásirese balalar arasynda jıi kezdesedi. Tirkelgen jaǵdaılardyń 70 paıyzy 14 jasqa deıingi balalarǵa tıesili. Onyń ishinde bes jasqa tolmaǵan 150-ge jýyq bala qyzylsha juqtyrǵan.
Aýrý juqtyrǵandardyń basym bóligi Aqtaý qalasynda tirkelgen. Jalpy jaǵdaılardyń 68,2 paıyzy qalaǵa tıesili. Munaıly aýdanynda — 9,7%, Qaraqııa aýdanynda — 7,6%, Jańaózen qalasynda — 4%, Mańǵystaý aýdanynda — 3,7%, Túpqaraǵan aýdanynda — 3%, Beıneý aýdanynda — 1,6% jaǵdaı anyqtalǵan.
Mamandar qyzylshanyń asa juqpaly vırýstyq ınfektsııa ekenin eskertedi. Aýrýdyń alǵashqy belgileri kádimgi tumaýǵa uqsas bolýy múmkin. Alaıda asqynǵan jaǵdaıda ókpe qabynýy, bronhıt jáne mıdyń zaqymdanýy sııaqty aýyr saldarǵa ákelýi yqtımal. Ásirese kishkentaı balalar men ımmýnıteti álsiregen adamdar úshin qaýipti.
Qyzylshanyń aldyn alýdyń negizgi joly — vaktsınatsııa. Qazaqstanda balalarǵa qyzylshaǵa qarsy ekpe bir jáne alty jasta salynady. Ol qyzamyq pen parotıtten de qorǵaıtyn biriktirilgen vaktsına.
Departament málimetinshe, óńirde qosymsha ımmýndaý sharalarymen 12 myńnan astam bala qamtylǵan. Mamandar ata-analarǵa balalarynyń ekpe alý mártebesin tekserip, ýaqytynda vaktsına saldyrýǵa keńes beredi.
Eske salaıyq, buǵan deıin Atyraýda qyzylshamen aýyrǵan bir jasar qyz kóz jumǵanyn habarlaǵan edik.