Mańǵystaý oblysynda ken ornyndaǵy uńǵymada tótenshe jaǵdaı boldy
AQTAÝ. KAZINFORM – Búgin Mańǵystaý oblysynyń Beıneý aýdanynda ornalasqan Varro Operating Group JShS-niń «Tolqyn» ken ornyndaǵy №57 uńǵymasynda avarııalyq jaǵdaı oryn aldy.
Óńirdegi TJD taratqan derekke qaraǵanda, uńǵymadan gaz-sý qospasynyń órtsiz shyǵýy tirkelgen. Zardap shekkender joq.
Qazirgi ýaqytta uńǵymanyń trýbalyq keńistiginen gaz-sý qospasynyń shyǵýy jalǵasyp jatyr.
Apat saldaryn joıý úshin oqıǵa ornyna Mańǵystaý oblysy Tótenshe jaǵdaılar departamentiniń 10 tehnıkasy, 32 qyzmetkeri jáne 1 ushqyshsyz ushý apparaty jumyldyryldy. Sonymen qatar:
-
«Aqberen» JShS,
-
«Ońtústik munaı servıs» JShS,
-
«Nobilis Corp» JShS,
-
«Varro Operating Group» JShS-niń kúshteri men quraldary tartyldy.
Qaýipsizdik sharalary kúsheıtildi. Qazirgi ýaqytta jaǵdaı turaqty baqylaýda.
Mańǵystaý oblysy Tótenshe jaǵdaılar departamentiniń málimetinshe, barlyq qajetti sharalar qabyldanýda. Ahýaldyń damý barysy týraly qosymsha aqparat beriledi.
Aıta keteıik, Mańǵystaýda teńiz jaǵalaýynan 279 ıtbalyqtyń óleksesi tabyldy.