Mańǵystaý oblysynda qaterli dertke shaldyqqan naýqastar járdemaqydan qaǵylǵan
AQTAÝ. KAZINFORM – Mańǵystaý oblysynyń prokýratýrasy onkologııalyq naýqastardy medıtsınalyq-áleýmettik saraptamadan ótýge jiberý tártibiniń zańdylyǵyn teksergen. Nátıjesinde qoldanystaǵy zańnama talaptaryna qaramastan, 3-4 toptaǵy onkologııamen aýyratyn jáne pallıatıvtik kómek alatyn 661 adamnyń múgedektikti resimdeý jáne kepildik berilgen áleýmettik járdemaqyny alý múmkindiginen aıyrylǵany anyqtaldy.
– Tirkelgen jeri boıynsha emhanalardaǵy emdeýshi dárigerler naýqastarǵa saraptamadan ótý kerektigin eskertpegen. Bir naýqas 5 jyldan beri bilmesten júr. Birine 2 aı bolǵan. Medıtsınalyq-áleýmettik saraptamada naýqastarǵa múgedektik, áleýmettik járdemaqylar men basqa da jeńildikter taǵaıyndalady, - deıdi Mańǵystaý oblystyq prokýratýrasy qoǵamdyq múddelerdi qorǵaý basqarmasynyń prokýrory Ǵanı Boranbaev.
Anyqtalǵan buzýshylyqtardy joıý maqsatynda prokýrorlyq qadaǵalaý aktisi engizilgen. Sonyń arqasynda densaýlyq saqtaý basqarmasy atalǵan tulǵalardy medıtsınalyq-áleýmettik saraptamadan ótýge jiberý jumystaryn bastady. Bul protsess oblys prokýratýrasynyń baqylaýyna alyndy.
Buǵan deıin, elimizde 2025 jyly járdemaqylar men zeınetaqy neshe paıyzǵa ósetini týraly jazǵan bolatynbyz.
