Mańǵystaý oblysynda qasqyrdyń úıiri vıdeoǵa túsip qaldy
ASTANA. KAZINFORM — Mańǵystaý oblysy Qulaaly aralynda túsirilgen qasqyrlar úıiriniń vıdeosy áleýmettik jelilerde keń tarady. Jeli qoldanýshylary nazaryn aýdarǵan beınejazbaǵa baılanysty ekolog maman túsinikteme berdi.
Taratylǵan vıdeoda qasqyrlardyń ıttermen arpalysyp jatqany anyq baıqalady.
Lada portaly málim etkendeı, ECOJER qaýymdastyǵy janyndaǵy óńirlik ekologııalyq keńestiń tóraǵasy Ádilbek Qozybaqovtyń aıtýynsha, qasqyrlar bul araldarda ondaǵan jyldar boıy tirshilik etedi. Olar kóbine jaǵalaýǵa tolqyn ákelgen ıtbalyqtardyń ólekselerimen qorektenedi. Keı jaǵdaılarda tiri teńiz ıtbalyǵyn aýlap alý da múmkin. Sonymen qatar olardyń ratsıonyna balyq, sý qustary jáne qus jumyrtqalary kiredi.
Mamannyń sózinshe, erekshe sýyq qys mezgilinde teńiz muz qabatymen jabylǵan kezde qasqyrlar materıkke ótip ketýi yqtımal. Basqa maýsymdarda bul sırek kezdesedi, alaıda sońǵy jyldardaǵy teńiz deńgeıiniń tómendeýine baılanysty mundaı jaǵdaıdy tolyq joqqa shyǵarýǵa bolmaıdy.
Ekolog turǵyndarǵa qaýipsizdik sharalaryn da eskertti.
— Qasqyrmen betpe-bet kelgen jaǵdaıda janýarǵa jaqyndamaý, tamaq usynbaý nemese baılanys ornatýǵa tyryspaý qajet, — dedi ol.
Osydan buryn QR Ekologııa jáne tabıǵı resýrstar vıtse-mınıstri Nurken Shárbıev ShQO aýmaǵynda aıý, qasqyr jáne qaban sanynyń artýyna qatysty túsinik berdi.