Mańǵystaý oblysynda eki ótkizý pýnkti jańǵyrtylyp jatyr: tranzıt kólemi artpaq

AQTAÝ. KAZINFORM – Mańǵystaý oblysynda «Tájen» jáne «Temir baba» shekaralyq ótkizý pýnktteri jańǵyrtylýda, dep habarlaıdy Qarjy mınıstrligi.

«Temir baba» ótkizý pýnkti – Qazaqstan men Túrikmenstan arasyndaǵy jalǵyz avtomobıl shekara ótkeli. Bul nysan Túrikmenstan arqyly Túrkııa, Pákistan, Aýǵanstan, BAÁ syndy elderge shyǵýǵa múmkindik beredi. Sonymen qatar, osy baǵytpen Túrkııadan halyq tutynatyn taýarlar men munaı-gaz salasyna arnalǵan jabdyqtar, al Túrikmenstan men Pákistannan kókónister men jemister jetkiziledi.

«Tájen» ótkizý pýnkti – Qazaqstan-Ózbekstan shekarasynda ornalasqan jáne batys aımaqtaǵy jalǵyz avtomobıl ótkeli sanalady. Bul nysan arqyly negizinen Reseı men Eýropaǵa tranzıttik júkter ótkiziledi (90%). Sonymen qatar, Ózbekstannan Reseıge eńbek mıgranttarynyń negizgi kóshi osy aýmaq arqyly ótedi.

Qazirgi tańda eki bekette qozǵalys jolaqtaryn keńeıtý, zamanaýı ınspektsııalyq-tekserý keshenderin ornatý, avtomatty salmaq ólsheý qurylǵylary men tsıfrly baqylaý júıelerin engizý jumystary júrgizilýde. Jańǵyrtýǵa qaramastan ótkizý pýnktteri shtattyq rejımde jumys istep tur.

– Bul jobalar tolyq aıaqtalǵanǵa deıin turaqty baqylaýda bolady, – dedi Qarjy mınıstrliginiń apparat basshysy Ernar Erjanov.

Kóshpeli keńestiń qorytyndysy boıynsha jańǵyrtý jumystaryn jedeldetý, qyzmetkerler men tehnıkanyń sanyn arttyrý jóninde tapsyrmalar berildi.

Sonymen qatar, anyqtalǵan kemshilikterge baılanysty «Tájen» jáne «Temir baba» keden beketteriniń basshylaryn tártiptik jaýapkershilikke tartý máselesi qaralýda.

Aıta keteıik, buǵan deıin Qazaqstan men Ózbekstan shekara beketindegi ahýal qalaı ekenin jazǵanbyz.