Mańǵystaý oblysynda bıýdjetten 29,5 mln teńge jymqyrǵan kolledj basshysy 7 jylǵa sottaldy

AQTAÝ. KAZINFORM – Prokýratýra organdary bıýdjet qarajatyn tıimdi paıdalaný zańdylyǵynyń saqtalýyna turaqty túrde taldaý júrgizip keledi. Taldaý barysynda gýmanıtarııalyq kolledj dırektory qyzmetkerlerge tıesili eńbek syıaqy tólemderin jymqyrý faktisi belgili boldy. Bul týraly Mańǵystaý oblystyq prokýratýrasynyń baspasóz qyzmeti málimdedi.   

«Kolledj dırektory 2022 jylǵy jeltoqsan men 2023 jyldyń tamyz aılary aralyǵynda kolledjdiń 29 qyzmetkerine syıaqy berý týraly negizsiz buıyryqtar shyǵaryp, 29,5 mln teńgeni zańsyz ıemdengen», - delingen habarlamada. 

Beıneý aýdandyq sotynyń úkimimen kolledj dırektory QR QK-niń 189-baby 4-bóliginiń 2) tarmaǵymen kináli dep tanylyp, 7 jyl merzimge bas bostandyǵynan aıyrý jazasy taǵaıyndaldy.

Memleketke keltirilgen shyǵyn 29 550 929 teńge óndirildi.