Mańǵystaý oblysynda bir otbasynyń 7 adamy gazdan ýlanyp, qaıtys boldy

AQTAÝ. KAZINFORM – Búgin, 2 naýryz kúni Mańǵystaý oblysy Munaıly aýdany Basqudyq aýylyndaǵy jeke turǵyn úıde bir otbasy músheleriniń ýlaný oqıǵasy tirkeldi. 

Qutqarýshylar men jedel járdem brıgadalary oqıǵa ornyna jetken kezde úıden 7 adamdy tapty. Olardyń beseýi — kámeletke tolmaǵan balalar. Barlyǵy oqıǵa ornynda kóz jumdy. 

Mańǵystaý oblystyq tótenshe jaǵdaılar departamentiniń aldyn ala boljamy boıynsha, qaıǵyly oqıǵa gaz jabdyqtaryn paıdalaný erejesin buzý saldarynan bolǵan.

Tótenshe oqıǵanyń sebebin anyqtaý úshin arnaıy komıssııa quryldy. Ony Mańǵystaý oblysy ákiminiń birinshi orynbasary Erbol Іzbergenov basqarady.

— Qaıtys bolǵan otbasynyń týystaryna jan-jaqty kómek beriledi, sonyń ishinde jerleý rásimin uıymdastyrýǵa qoldaý kórsetiledi. Atalǵan oqıǵa Mańǵystaý oblysy ákiminiń jeke baqylaýynda bolady, - delingen Mańǵystaý oblysy ákiminiń baspasóz qyzmeti taratqan habarlamada.

Mańǵystaý oblysy Munaıly aýdanynda budan bir apta buryn da gazdan ýlaný deregi tirkelip, bir úıdiń 3 balasy qaza tapty.