Aqtaýda et pen kókónis baǵasyn negizsiz kótergen kásipkerlerge ákimshilik shara qoldanyldy
AQTAÝ. KAZINFORM – Saýda jáne ıntegratsııa vıtse-mınıstri Aıdar Ábildábekov Aqtaý qalasyndaǵy kóterme bazarlardy tekserdi. Ol «Asar-S» bazary, sondaı-aq KazFruit jáne Asia Fruit Aktau iri kókónis qoımalaryn aralap shyqty. Bul nysandar arqyly Mańǵystaý oblysyna ónimniń negizgi bóligi jetkiziledi. Tekserý Premer-mınıstr Oljas Bektenovtiń tapsyrmasy boıynsha azyq-túlik naryǵynda tártip ornatý jáne deldaldyqty azaıtý maqsatynda júrgizildi.
Óńirde arnaıy komıssııa qurylyp, «Kók bazar», «Asar-S» bazarlarynda jáne «Maǵash» bazarynyń et sektorynda monıtorıng júrgizildi. Tekserý barysynda birneshe zańbuzýshylyq anyqtaldy. Bes kásipker áleýmettik mańyzy bar azyq-túlik taýarlaryn belgilengen saýda ústemesinen joǵary baǵamen satqany úshin ákimshilik jaýapkershilikke tartyldy.
«Maǵash» bazarynda et ónimderiniń baǵasyn negizsiz kóterý faktisi tirkeldi. Komıssııanyń aralasýynan keıin ettiń bir kılogramynyń baǵasy 4 500 teńgeden 3 500 teńgege deıin tómendedi.
Sonymen qatar jetkizý tizbekterinde artyq deldaldyq býyndar anyqtaldy. Bir taýar boıynsha bir kún ishinde birneshe mámile jasalǵan jaǵdaılar anyqtaldy. Nátıjesinde «Tovary ı Servıs» JShS tıimsiz deldal retinde tanylyp, jetkizý tizbeginen shyǵaryldy. Bul Aqtaýdaǵy iri saýda jelileriniń birine ónimdi kóterme jetkizýshiden tikeleı satyp alýǵa múmkindik berip, kartop baǵasyn 275 teńgeden 242 teńgege, pııazdy 165 teńgeden 132 teńgege deıin tómendetti.
Uqsas jaǵdaı Asia Fruit Aktau men Asia Fruit Aktau KZ arasyndaǵy kókónis jetkizý barysynda da anyqtaldy. Deldal alynyp tastalǵan soń saýda jelisi tikeleı satyp alýǵa kóship, kartop baǵasy 235 teńgeden 225 teńgege, sábiz 264 teńgeden 205 teńgege deıin tómendedi.
Aıdar Ábildábekov óńirde deldaldyq shemalardy anyqtaý jumysyn kúsheıtý qajettigin atap ótti. Ol jyl basynan beri anyqtalǵan deldaldar sany az ekenin jáne bul kórsetkish kúmán týdyratynyn aıtty. Sonymen qatar Mańǵystaý oblysy ónimniń basym bóligin ımporttaýshylar men basqa óńirlerdiń kóterme jetkizýshileri arqyly alatyn aımaqtardyń biri sanalady. Bul máseleniń sheshimi aımaq basshylyǵynyń naqty ári nátıjeli jumysyna baılanysty ekenin jetkizdi. Tıisti deńgeıde jumys júrgizilgen jaǵdaıda deldaldyq shemalardy júıeli túrde anyqtaýǵa bolady.
2026 jyldyń basynan beri memlekettik baqylaý kúsheıtildi. 23 sáýirdegi jaǵdaı boıynsha 204-4-bap boıynsha 1 406 aıyppul salyndy, bul 2025 jylǵy osy bap boıynsha quqyqbuzýshylyqtardyń shamamen 50 paıyzyn quraıdy. Aıyppuldardyń jalpy somasy 53 mln teńgeden asty. Onyń ishinde Mańǵystaý oblysynda 49 aıyppul salynyp, jalpy somasy 540 myń teńge boldy.
Baǵa aıyrmashylyǵyn qoldaný jáne baǵa belgisiniń bolmaýyna baılanysty 489 qaýly shyǵarylyp, 18,4 mln teńge kóleminde aıyppul salyndy. Mańǵystaý oblysynda 36 qaýly shyǵarylyp, 1,1 mln teńgeden astam aıyppul óndirildi.
Qozǵalǵan ákimshilik ister sany boıynsha Mańǵystaý oblysy óńirler arasynda tórtinshi orynda tur.
Deldaldyq shemalardy anyqtaý maqsatynda óńirlik komıssııalardyń jumysy jandandy. Respýblıka boıynsha 372 otyrys ótkizilip, 1 092 zańbuzýshylyq anyqtaldy, 974 ákimshilik hattama toltyrylyp, 118 deldal jetkizý tizbeginen shyǵaryldy.
Mańǵystaý oblysynda 23 sáýirdegi jaǵdaı boıynsha 27 otyrys ótkizildi. Nátıjesinde 51 zań buzýshylyq tirkelip, onyń 49-ynda saýda ústemesiniń asyp ketýi anyqtaldy. Bul boıynsha ákimshilik hattamalar toltyrylyp, eki tıimsiz deldal jetkizý tizbeginen shyǵaryldy.
Oblys zańbuzýshylyqtar sany boıynsha altynshy orynda tur.
Sonymen qatar elektrondy shot-faktýralarǵa taldaý júrgizilip jatyr. Qazirgi ýaqytta 4 395 jetkizý tizbegi zerttelip, 2 361 táýekel anyqtaldy. Bul artyq ústeme men saýda zańnamasyn buzý jaǵdaılaryn ýaqytyly anyqtaýǵa múmkindik beredi.
Eske sala keteıik, buǵan deıin Abaı oblysynda azyq-túlik baǵasyn negizsiz ósirgen kásipkerlerge shara qoldanylǵanyn habarlaǵan edik.
