Mańǵystaý oblysynda «Aıbalta-2025» oqý-jattyǵýy aıaqtaldy

AQTAÝ. KAZINFORM – Beıneý aýyly mańyndaǵy oqý-jattyǵý polıgonynda «Aıbalta-2025» jedel-strategııalyq komandalyq-shtabtyq oqý-jattyǵýynyń jabylý saltanaty ótti.

Oqý-jattyǵý áskerdiń jyldam ózgerip otyratyn jaǵdaılarda áreket etý qabiletin aıqyn dáleldedi. Manevrler barysynda urys júrgizýdiń ozyq tásilderi, jańa taktıkalyq ádister men manevr jasaý strategııalary synnan ótti.

— Ásker tekteri men bólimderdiń joǵary deńgeıdegi ózara yqpaldastyǵy barlyq stsenarıılerdi pysyqtaýǵa jáne qoıylǵan tapsyrmalardy tıimdi oryndaýǵa múmkindik berdi. Jeke quram dalalyq daıyndyqtyń, úılesimdiliktiń jáne qazirgi zamanǵy syn-qaterlerge beıimdelý qabiletiniń joǵary deńgeıin kórsetti, — delingen aqparatta.

Kásibı sheberligi men jetistikteri úshin úzdik shyqqan áskerı qyzmetshiler men bólimsheler qurmet gramotalarymen jáne baǵaly syılyqtarmen marapattaldy.

«Aıbalta-2025» oqý-jattyǵýy Qazaqstan áskeriniń qazirgi jedel jaǵdaılarda qorǵanys pen shabýylda jaýyngerlik tapsyrmalardy tıimdi oryndaı alatynyn dáleldedi. Jattyǵý barysynda jınaqtalǵan tájirıbe men nátıjeler jaýyngerlik daıarlyqty jetildirýge, jedel ónerdi damytýǵa jáne eldiń qorǵanys áleýetin nyǵaıtýǵa negiz bolmaq.

Aıta keteıik, Mańǵystaý oblysynda ótken jalpyáskerı daıarlyqtyń sońǵy kezeńi jaýyngerlik atysty qamtyǵan taktıkalyq manevrler bolǵanyn habarlaǵan bolatynbyz.