Mańǵystaý oblysynda aýdandyq aýrýhana qaıtarylǵan aktıvter esebinen jóndelip jatyr

AQTAÝ. KAZINFORM — Mańǵystaý oblysynyń Beıneý aýdanynda kópbeıindi ortalyq aýdandyq aýrýhanaǵa kúrdeli jóndeý júrgizilip jatyr. Medıtsınalyq mekemeni jańǵyrtý jumystary memleketke qaıtarylǵan aktıvter esebinen qarjylandyrylyp, «Aýylda densaýlyq saqtaýdy jańǵyrtý» pılottyq ulttyq jobasy aıasynda júzege asyrylýda.

Mańǵystaý oblysynda aýdandyq aýrýhana qaıtarylǵan aktıvter esebinen jóndelip jatyr
Foto: Beıneý aýdany ákimdigi

Jobanyń negizgi maqsaty — aýyl turǵyndaryna sapaly medıtsınalyq kómektiń qoljetimdiligin arttyryp, aýrýhananyń materıaldyq-tehnıkalyq bazasyn jańartý.

Joba aıasynda aýrýhana ǵımaratyn kúrdeli jóndeý jáne zamanaýı medıtsınalyq jabdyqtarmen jaraqtandyrý kózdelgen. Qurylys jumystaryna 123 adam jumyldyrylǵan. Búginde nysandaǵy jumystardyń 80 paıyzy aıaqtalǵan.

Mańǵystaý oblysynda aýdandyq aýrýhana qaıtarylǵan aktıvter esebinen jóndelip jatyr
Foto: Beıneý aýdany ákimdigi

Aýrýhana kesheni jalpy 11 bloktan turady. Qazirgi ýaqytta qurylys-montaj, ınjenerlik-kommýnıkatsııalyq jelilerdi tartý, ishki árleý jáne qasbetti qaptaý jumystary aıaqtalǵan. Sonymen qatar ǵımarattyń aınalasyn abattandyrý jáne kógaldandyrý sharalary qolǵa alynǵan. Aýrýhana aýmaǵyna 38 túp sándik qylqanjapyraqty aǵash otyrǵyzylyp, jaıaý júrginshiler jolyn tóseý jumystary bastaldy.

Mańǵystaý oblysynda aýdandyq aýrýhana qaıtarylǵan aktıvter esebinen jóndelip jatyr
Foto: Beıneý aýdany ákimdigi

Medıtsınalyq mekemeni jańǵyrtý barysynda dıagnostıkalyq qyzmetterdi damytýǵa da nazar aýdarylǵan. Atap aıtqanda, kompıýterlik tomografııa jáne rentgen-dıagnostıka qurylǵylaryn ornatýǵa arnalǵan kabınetter ázirlengen. Bul aýdan turǵyndaryna qajetti tekserýlerden jergilikti jerde ótýge múmkindik beredi.

Mańǵystaý oblysynda aýdandyq aýrýhana qaıtarylǵan aktıvter esebinen jóndelip jatyr
Foto: Beıneý aýdany ákimdigi

Qazirgi tańda aýrýhanada 170 tósek-oryn bar. Munda terapııa, kardıologııa, nevrologııa, hırýrgııa, travmatologııa, gınekologııa, perzenthana, balalar jáne juqpaly aýrýlar bólimsheleri jumys isteıdi.

Mańǵystaý oblysynda aýdandyq aýrýhana qaıtarylǵan aktıvter esebinen jóndelip jatyr
Foto: Beıneý aýdany ákimdigi

Kúrdeli jóndeý aıaqtalǵannan keıin aýrýhana janynan ońaltý bólimshesi men ınsýlt ortalyǵyn ashý josparlanyp otyr. Ońaltý bólimshesinde keminde 16, al ınsýlt bólimshesinde 10 tósek-oryn qarastyrylmaq. Bul aýdan turǵyndaryna mamandandyrylǵan medıtsınalyq kómekti turǵylyqty jerinde alýǵa múmkindik beredi.

Buǵan deıin Óskemende memleketke qaıtarylǵan aktıvter esebinen gematologııa ortalyǵy ashyldy.