Mańǵystaý oblysynda aýdan turǵyndaryna avtobýs pen arnaıy tehnıkalar tabystaldy
ASTANA. KAZINFORM – 5 qyrkúıekte Mańǵystaý oblysynyń ákimi Nurdáýlet Qılybaı óńirdegi halqy eń kóp Munaıly aýdany turǵyndarynyń ıgiligine jańa jolaýshylar avtobýstary men ınvotaksıler jáne arnaıy tehnıkalardyń kiltin tabystady.
«Aqtaý-Batyr-Aqtaý» baǵytyndaǵy avtobýstar jańartylyp, sońǵy úlgidegi zamanaýı «Yutong» markaly 10 avtobýs berildi. Jańa qoǵamdyq kólikter zamanǵa saı beınebaqylaý, aýa salqyndatqysh syndy qurylǵylarmen jabdyqtalǵan.
Munaıly aýdanynyń kommýnaldyq qyzmeti 2 traktor júksalǵysh tirkemesimen, 3 «Nıva» jeńil kóligi, assenızator jáne sý sorǵyshtarmen tolyqtyryldy.
Budan bólek, aýdandaǵy erekshe jandardyń erkin qozǵalýyna qajetti ınvotaksı paıdalanýǵa berildi.
Óńir basshysy Nurdáýlet Qılybaı saltanatty sharadaǵy quttyqtaý sózinde halyqtyń kúndelikti turmysyna qajetti kóliktermen qamtý isiniń jalǵasatynyn aıtty.
– Turǵyndarmen kezdesýlerde árdaıym ınvataksıdiń qajettiligi jóninde ýájder aıtylatyn. Bizdiń maqsat – halyqtyń ótinishin oryndap, olardyń turmys-tirshiligin barynsha jeńildetip, ómir súrýge qolaıly ortany qalyptastyrý. Búgin berilip jatqan qoǵamdyq kólikter aýdan halqynyń emin-erkin júrip-turýyna oń áserin tıgizedi dep oılaımyn. Bul da bir bılik pen bıznestiń ortasyndaǵy aýyzbirshiliktiń, kelise tikken tonnyń kórinisi, aıǵaǵy. Bul sońy emes, tapsyrys berildi, jaqsy is jalǵasyn tabady, - dedi Nurdáýlet Qılybaı.
Aıta ketsek, jyl basynan beri aýdan marshrýttary 61 jańa avtobýspen tolyqtyryldy.
