Mańǵystaý oblysynda áskerı-patrıottyq jastar jarysynda úzdikter anyqtaldy
AQTAÝ. KAZINFORM – Mańǵystaý oblysynda Áskerı-teńiz kúshteriniń teńiz jaıaý áskeri desanttyq-shabýyl batalony bazasynda «Aıbyn – 2026» áskerı-patrıottyq jastar jıynynyń oblystyq kezeńi ótti.
Jarysqa óńirdiń bes aýdany men eki qalasynan kelgen komandalar qatysty. Baıqaý birneshe kezeńnen turdy: kermege tartylý, jatyp dene kóterý, áskerı kross, AK-74 avtomatyn bólshektep-jınaý, arqan tartý, pnevmatıkalyq myltyqtan atý jáne estafeta. Bul synaqtar qatysýshylardan dene daıyndyǵynyń joǵary deńgeıin, tózimdilik, eptilik, jyldamdyq jáne komandalyq úılesimdilik talap etti.
Aqtaý qalasyndaǵy №22 mektep-gımnazııasynyń oqýshysy Kamıla Kostromına jarys týraly pikir bildirip, komandalyq rýhtyń mańyzdy ekenin atap ótti.
Jarystyń qorytyndysy boıynsha birinshi oryndy Aqtaý qalasynyń «Kaspıı» komandasy ıelendi. Ekinshi oryndy Munaıly aýdanynan kelgen «Jas jaýynger» áskerı-patrıottyq klýby, úshinshi oryndy Jańaózen qalasynyń «Qaısar» komandasy aldy.
Jeńimpazdar men júldegerler kýboktarmen jáne gramotalarmen marapattaldy. Olar maýsym aıynda Aqmola oblysynyń Şýchınsk qalasynda ótetin «Aıbyn» halyqaralyq áskerı-patrıottyq jastar jıynynda Mańǵystaý oblysynyń atynan óner kórsetedi.
Eske sala keteıik, buǵan deıin elordada Qarýly kúshterdiń úzdik mergenderi anyqtalǵanyn jazǵan edik.
