Mańǵystaý oblysynda balalardyń 37 paıyzynyń bilimi tómen ekeni anyqtalǵan
ASTANA. KAZINFORM - Memleket basshysy Qasym-Jomart Toqaev Mańǵystaý oblysynyń áleýmettik-ekonomıkalyq damýy jónindegi keńes barysynda óńirdegi bilim sapasyn synady.
– Aımaqta bilim sapasyn jaqsartý úshin birqatar shara qabyldandy. Biraq jumystyń nátıjesi kóńil kónshitpeı tur. Ekiden alty jasqa deıingi balalardyń 93,9 paıyzy balabaqshaǵa barady, ıaǵnı, 46 myń bala. Biraq oryn tapshylyǵy áli joıylǵan joq. 3,5 myńǵa jýyq bala kezekte tur. Bilim sapasyna qatysty túıtkilder bar, - dedi Prezıdent.
Osy rette ol byltyr mekteptegi bilim deńgeıin baǵalaý úshin oblysta arnaıy test ótkizilgenin aıtyp ótti. Oǵan qatysqan balalardyń 37 paıyzynyń bilimi tómen ekeni anyqtaldy. Byltyrǵy Ulttyq biryńǵaı testileýdiń nátıjeleri de máz emes. 1,5 myńǵa jýyq bala, ıaǵnı, 20 paıyzy oqýǵa túsýge qajetti eń tómengi baldyń ózin jınaı almaǵan.
- Bul – elimizdegi eń nashar kórsetkishtiń biri, - dedi Prezıdent.
Sondaı-aq Memleket basshysy bıyl qańtar aıyndaǵy testileýge 8 myńnan astam oqýshy qatysqannyn onyń úshten biri shekti kórsetkishten óte almaǵanyn aıtyp ótti.
Przıdenttiń aıtýynsha, oblystaǵy aýyl jáne qala mektepteriniń arasyndaǵy bilim sapasynyń alshaqtyǵy – ózekti máseleniń biri. Tipti Aqtaý men Jańaózendegi mektepterdiń bilim deńgeıinde aıyrmashylyq bar. Mekteptegi oryn tapshylyǵy azaımaq túgili kóbeıip barady. Qazir 14 myńǵa jýyq oryn jetispeıdi. Úsh aýysymdy jáne apatty mektepter máselesi áli kúnge deıin sheshimin tapqan joq.
«Samuryq-Qazyna» qory oblys ákimdigimen birlesip, jaıly mektepterdiń qurylysyn tezdetýi qajet. Buǵan qosa sapaly standartty mektep salý jumysyn jalǵastyrý kerek. Jalpy osy saladaǵy túıtkilderdi sheshý úshin Bilim berý júıesin damytýdyń 2023-2029 jyldarǵa arnalǵan óńirlik jol kartasy qabyldandy. Alaıda naqty nátıje joq. Jol kartasyn sapaly ári tolyq júzege asyrý úshin jumysty barynsha jandandyrý qajet,- dedi Qasym-Jomart Toqaev.
Osyǵan deıin Prezıdent Aqtaýda úleskerler qarjy salǵan 6 úıdiń qurylysy bitpeı turǵanyn synaǵan bolatyn.