Mańǵystaý oblysynda alıment boıynsha 95 mln teńgeden asa bereshek óndirildi
ASTANA. KAZINFORM — Mańǵystaýda 395 balanyń alıment alý quqyǵy qorǵaldy, dep habarlaıdy oblystyq prokýratýranyń baspasóz qyzmeti.
Bıylǵy jyldyń alǵashqy alty aıynda Mańǵystaý oblysynda alıment tóleýden qasaqana jaltarǵan 133 boryshker jaýapqa tartyldy.
Olardyń ishinde 27 boryshker qylmystyq, 106 boryshker ákimshilik jaýapqa tartylǵany belgili boldy.
Vedomstvo málimetinshe, jaýapqa tartylǵandardyń ishinde birneshe jyldan beri alıment tólemeý úshin sanaly túrde jumysqa ornalaspaý, jumys orny men tabysyn jasyrý derekteri anyqtaldy.
Máselen, «Y» esimdi boryshker tabysynyń úshten bir bóligi mólsherinde kámeletke tolmaǵan eki balasyn asyraýǵa alıment tóleýge mindetti bolǵan. Soǵan qaramastan, ol alıment tóleýden qasaqana jaltaryp, nátıjesinde bereshek somasy 3 mln teńgeden asty.
— Prokýrorlyq tekserý nátıjeleri boıynsha oǵan qatysty Qylmystyq kodekstiń 139-baby boıynsha qylmystyq is qozǵaldy. Sot úkimimen boryshker kináli dep tanylyp, 1 jylǵa bas bostandyǵyn shekteý jazasyna sottaldy. Sot úkimi zańdy kúshine engennen keıin alıment boıynsha bereshek tolyq kólemde óteldi, — delingen habarlamada.
Aıta keteıik, prokýratýranyń aralasýymen alıment boıynsha 95 mln teńgeden astam bereshek óndirilip, 395 kámeletke tolmaǵan balanyń quqyqtary qorǵaldy.
Buǵan deıin Jambyl oblysynda 300-den astam áıel alıment tóleıtinin jazǵanbyz.
