Mańǵystaý oblysynda alǵashqy seısmıkalyq stantsııalar jelisi ornatylady
AQTAÝ. KAZINFORM – TJM Seısmologııalyq baqylaýlar men zertteýlerdiń ulttyq ǵylymı ortalyǵynyń ǵalymdary Mańǵystaý oblysynyń TJD-men birlesip óńir aýmaǵyn zerdeleý ekspedıtsııasyn bastady. Bul týraly TJM baspasóz qyzmeti habarlady.
Ekspedıtsııa aıasynda jańa seısmıkalyq stantsııalar ornatý josparlanǵan óńir aýmaǵynda zertteý, barlaý jáne baǵalaý maqsatynda sholý jumystary júrgiziledi. Bul shara tarıhı oqıǵa bolyp tabylady, sebebi osy óńirde buryn turaqty seısmıkalyq baqylaý stantsııalarynyń jelisi bolmaǵan.
— Ǵylymı zertteýlerdi barlyq jerde júrgizý qajet. Birinshiden, bul óńirdegi ózgeristerdi baqylaýǵa jáne múmkin bolatyn aýytqýlarǵa aldyn ala áreket etýge múmkindik beredi. Ekinshiden, mundaı zertteýler jer silkinisteriniń tabıǵatyn tereń ári jan-jaqty túsiný úshin qajet.
Bul jumystarmen tabıǵat pen jer qoınaýynda júrip jatqan qubylystardy zertteıtin Seısmologııalyq baqylaýlar men zertteýlerdiń ulttyq ǵylymı ortalyǵy tehnogendik seısmıkalyq zerthanasynyń mamandary aınalysady, — delingen habarlamada.
Jumys barysynda eldi mekenderdiń, joldardyń, baılanys jáne ózge de kommýnıkatsııalardyń ornalasýyn anyqtaý maqsatynda jergilikti jerge barlaý júrgiziledi.
Sonymen qatar seısmıkalyq stantsııalardy ornatý úshin óńirdiń geologııalyq erekshelikteri de qarastyrylady. Seısmologtar jergilikti jerdegi túrli shýlardy tirkeıtin joǵary tehnologııalyq jáne sezimtal quraldardy paıdalanady. Ekspedıtsııa jumysynyń nátıjeleri boıynsha seısmıkalyq stantsııany belgili bir núktede turǵyzý týraly sheshim qabyldaý úshin barlyq faktor baǵalanady.
Mańǵystaý oblysynda seısmıkalyq stantsııalar jelisin ornatý óńirdiń seısmıkalyq qaýipsizdigin arttyrý jolyndaǵy mańyzdy qadam bolmaq. Bul jerasty dúmpýlerin ýaqtyly tirkep, olardyń tabıǵatyn taldaýǵa ǵana emes, jer qyrtysynda júrip jatqan úderisterdi ǵylymı turǵyda tereńirek túsinýge de múmkindik beredi. Jınalǵan derekter tabıǵı qaýip-qaterlerdi eskere otyryp, óńirdiń turaqty damýyn qamtamasyz etýge septigin tıgizedi.
Aıta ketelik Mańǵystaýda avtotsısterna aýdarylyp, jerge munaı tógilip qalǵan edi.