Mańǵystaý oblysynda 90 myń gektardan astam jer memleket menshigine qaıtaryldy

AQTAÝ. KAZINFORM – Mańǵystaý oblysynyń prokýratýrasymen jer zańnamasynyń saqtalýyna turaqty negizde taldaý júrgizilip jatyr. 

Oblys prokýratýrasynyń málimetinshe, 2025 jyly qadaǵalaý aktilerimen memleket menshigine jalpy aýmaǵy 91 myń gektar, quny 800 mln teńge quraıtyn 87 jer ýchaskesi qaıtaryldy. 

– Jer ýchaskelerin zańsyz berý jáne nysanaly maqsatyna sáıkes paıdalanbaý faktileri anyqtaldy. Mysaly, qalalyq ákimdikpen «I» JShS-ne ıgerilmegen jer ýchaskesine teńiz jaǵalaýynan qosymsha 0,5 gektar jer bólingen. Sot sheshimimen bul jer ýchaskesi memleket menshigine qaıtaryldy. Budan bólek, Aqtaý qalasy aýmaǵynda memleket menshigindegi 9 jer ýchaskesin óz betinshe ıelený faktileri anyqtalyp - 2 mln teńgeden astam aıyppul salyndy. Sondaı-aq ıgerilmegendikten memleketke 83 myń gektar aýyl sharýashylyǵy jerler qaıtaryldy, - dep atap ótti oblystyq prokýratýra ókilderi.

Anyqtalǵandaı, aýyl sharýashylyǵy janýarlarynyń sany aıylymdardyń jalpy alańyna shekti ruqsat etilgen júkteme normasyna sáıkes kelmegen, ıaǵnı jer ýchaskeleriniń is júzinde paıdalanylmaǵanyn kórsetti. 

Qazirgi kezde bul baǵyttaǵy jumystar áli de jalǵasyp jatyr. 

Aıta keteıik, buǵan deıin Almatyda quny 2,6 mlrd teńge bolatyn Baspalar úıi memleket menshigine qaıtarylǵan edi.