Mańǵystaý oblysynda 80-nen astam adam qarjy pıramıdasynyń qurbany boldy
ASTANA. KAZINFORM — QMA Mańǵystaý oblysy boıynsha departamenti «LiveGood» qarjy pıramıdasynyń qurylymdyq bólimshesin basqarý, zańsyz kásipkerlikpen aınalysý jáne qylmystyq jolmen alynǵan aqshalaı qarajatty zańdastyrý faktileri boıynsha tergeýdi aıaqtady.
«LiveGood» kompanııasy dárilik zattar men bıologııalyq belsendi qospalardy (BBQ) satý túrindegi jelilik marketıng retinde kórinip, shyn máninde salymshylardy tartý arqyly kepildendirilgen tabys ýáde etip otyrǵan. Ónimdi satyp alý mindetti bolmaǵan. Qatysýshylardyń tabysy tikeleı túrde jazylý quny 50 AQSh dollarynan bastalatyn jańa adamdardy tartý sanyna baılanysty bolǵan.
— Saldarynan 80-nen astam azamat qarjy pıramıdasynyń qurbanyna aınaldy. Salymshylardyń qarajatyn zańdastyrý maqsatynda kúdikti olardy krıptovalıýta bırjasy arqyly zańsyz operatsııalarmen shyǵaryp, keıin týystarynyń shottaryna aýdarǵan. Qylmystyq jolmen alynǵan qarajatqa ol Aqtaý qalasynan eki páter men Lexus avtokóligin satyp alǵan. Jyljymaıtyn múliktiń jalpy quny — 43 mln teńge. Sottyń sanktsııasymen 132 mln teńge kólemindegi onyń esepshottary men múlkine tyıym salyndy, — delingen QMA habarlamasynda.
Kúdiktige qatysty bultartpaý sharasy retinde úıqamaqqa alyndy. Іs sotqa joldandy. QPK 201-babyna sáıkes, ózge aqparat jarııa etilmeıdi.
Aıta ketelik Harmony Rider Technology qarjy pıramıdasy aqtóbelikterden 197 mln teńge jymqyrǵan edi.